મુંબઈ-પુણે એક્સપ્રેસ-વે પર જ્વલનશીલ ગેસનું ટેન્કર પલટતા હાઈવે બંધ, 25 કિમી સુધી ટ્રાફિક જામ
મુંબઈ: પુણે અને મુંબઈને જોડતા મુખ્ય એક્સપ્રેસ વે પર મંગળવારે સાંજે એક મોટી દુર્ઘટના સર્જાતા તંત્ર દોડતું થયું હતું. આદોશી ટનલ પાસે પ્રોપલીન ગેસથી ભરેલું એક ટેન્કર પલટી જતાં ગેસ ગળતર શરૂ થયું હતું, જેના કારણે હાઈવે પર ભયનો માહોલ જોવા મળ્યો હતો. ગેસ અત્યંત જ્વલનશીલ હોવાથી કોઈ મોટી જાનહાનિ ન થાય તે માટે વહીવટીતંત્રે તાત્કાલિક અસરથી મુંબઈ તરફ જતી તમામ લેન બંધ કરી દીધી હતી, જેની અસર કલાકો સુધી જોવા મળી હતી.
પ્રાપ્ત વિગતો અનુસાર, મંગળવારે સાંજે અંદાજે 6:15 વાગ્યે ચાલકે ટેન્કર પરનો કાબૂ ગુમાવતા તે વળાંક પર પલટી ગયું હતું. ગેસ લીક થવાની માહિતી મળતા જ NDRF, ફાયર બ્રિગેડ અને કેમિકલ નિષ્ણાતોની ટીમ ઘટનાસ્થળે પહોંચી ગઈ હતી. જોકે, રાહતની વાત એ છે કે આ ભયાનક અકસ્માતમાં કોઈ જાનહાનિ થઈ નથી. ઇમરજન્સી ટીમો દ્વારા અત્યંત સાવચેતીપૂર્વક ગેસ લીકેજ રોકવા અને ટેન્કરને હટાવવા માટે 12 કલાકથી વધુ સમય સુધી જહેમત ઉઠાવવામાં આવી હતી.
આ અકસ્માતને કારણે એક્સપ્રેસ વે પર વાહનોના પૈડાં થંભી ગયા હતા અને અંદાજે 25 કિમી લાંબો ટ્રાફિક જામ સર્જાયો હતો. બસો અને ટ્રકો સહિત હજારો વાહનો રસ્તામાં ફસાયા હતા, જેના કારણે વૃદ્ધો અને બાળકો સહિતના મુસાફરોને ખાવા-પીવાની અને પાયાની સુવિધાઓ વગર ભારે હાલાકી ભોગવવી પડી હતી. સુરક્ષાના કારણોસર જ્યાં સુધી નિષ્ણાતો ક્લિયરન્સ ન આપે ત્યાં સુધી રસ્તો ખોલવો જોખમી હોવાથી તંત્ર દ્વારા કડક વલણ અપનાવવામાં આવ્યું હતું.
હાઈવે પોલીસ અને સુરક્ષા એજન્સીઓએ મુસાફરોને આ માર્ગનો ઉપયોગ ટાળવા અને જૂના મુંબઈ-પુણે હાઈવે જેવા વૈકલ્પિક રસ્તાઓ પસંદ કરવા વિનંતી કરી છે. અધિકારીઓએ જણાવ્યું હતું કે, વહેલી તકે સ્થિતિ પર નિયંત્રણ મેળવી લેવામાં આવશે, પરંતુ સુરક્ષા સાથે કોઈ સમજૂતી કરવામાં આવશે નહીં. મુસાફરોને લાઈવ અપડેટ્સ તપાસતા રહેવા અને જરૂર પડે પોલીસ કંટ્રોલ રૂમનો સંપર્ક કરવા માટે પણ સૂચના આપવામાં આવી છે. સમયસર મળેલી માહિતીને કારણે મોટી આગની દુર્ઘટના ટળી ગઈ છે.
આપણ વાંચો: મુંબઈને ૧૧ ફેબ્રુઆરીના મળશે મેયરસાત ફેબ્રુઆરીના ઉમેદવારી પત્રક દાખલ કરવામાં આવશે
