(અમારા પ્રતિનિધિ તરફથી)
મુંબઈ: કર્ણાટક રાજ્યના મૈસૂર ખાતે ગૅરેજની આડમાં ધમધમતા ડ્રગ્સ બનાવવાના કારખાના પર દરોડો પાડી મુંબઈની સાકીનાકા પોલીસે અંદાજે 382 કરોડ રૂપિયાનું મેફેડ્રોન (એમડી) જપ્ત કર્યું હતું. ડેપ્યુટી પોલીસ કમિશનર દત્તા નલાવડેએ જણાવ્યું હતું કે આ કેસમાં અગાઉ સાકીનાકા પોલીસે વસઈના કામણ ગાંવ ખાતેની એક લૅબોરેટરી પર કાર્યવાહી કરી ત્રણ આરોપીની ધરપકડ કરી હતી. લૅબોરેટરીમાં એમડી ડ્રગ બનાવવામાં આવતું હતું. અંદાજે આઠ કરોડ રૂપિયાનું એમડી અને લૅબોરેટરીમાંનાં સાધનો જપ્ત કરવામાં આવ્યાં હતાં.
વસઈની લૅબોરેટરીના કેસની તપાસમાં પોલીસે શુક્રવારે બાન્દ્રા રેક્લેમેશન ખાતેથી આરોપી સલીમ ઈમ્તિયાઝ શેખ ઉર્ફે સલીમ લંગડા (45)ની ધરપકડ કરી હતી. એમડી ડ્રગ કર્ણાટકના મૈસૂર ખાતેથી ખરીદવામાં આવ્યું હોવાનો ખુલાસો લંગડાએ કર્યો હતો.
આરોપી લંગડા પાસેથી મળેલી માહિતીને આધારે પોલીસની એક ટીમ મૈસૂર પહોંચી હતી. શહેરના રિંગ રોડ પરના સર્વિસ રોડ ખાતે આવેલા એક ગૅરેજમાં એમડી બનાવવાનું કારખાનું શરૂ કરવામાં આવ્યું હતું. કારનાખા પર રેઇડ કરતાં અંદાજે 392 કરોડ રૂપિયાનું 188 કિલો એમડી મળી આવ્યું હતું. એ સિવાય કારખાનામાંથી એમડી બનાવવા માટેનો કાચો માલ અને સાધનસામગ્રી પણ જપ્ત કરવામાં આવી હોવાનું અધિકારીએ જણાવ્યું હતું.
