મેટ્રો લાઇન થ્રીમાં મોબાઈલ નેટવર્કની સમસ્યાનો અંત, હવે આ સુવિધા મળશે

મુંબઈઃ મુંબઈ મેટ્રો-3 ના બીજા તબક્કાના ઉદ્ઘાટનથી જ પ્રવાસીઓ નેટવર્ક ન મળવાથી પરેશાન છે. તેને કારણે મેટ્રોની ટિકિટો સુધ્ધાં કઢાવવી મુશ્કેલ બની રહી છે. ત્યારે ભૂગર્ભ એક્વા લાઇન પર મુસાફરો માટે મોટી રાહત તરીકે, મુંબઈ મેટ્રો રેલ કોર્પોરેશન (MMRC) એ તમામ કાર્યરત એક્વા લાઇન સ્ટેશનોના કોનકોર્સ સ્તરે મફત વાઇ-ફાઇની જાહેરાત કરી છે.

આ પગલું સ્ટેશનો અને ટ્રેનોમાં સતત મોબાઇલ નેટવર્ક બ્લેકઆઉટના પ્રતિભાવમાં આવ્યું છે, જેના કારણે ડિજિટલ ટિકિટિંગ, UPI ચુકવણીઓ અને સંદેશાવ્યવહાર સહિત મોબાઇલ-આધારિત સેવાઓ ખોરવાઈ ગઈ હતી. મુંબઈ મેટ્રો લાઈન 3 દ્વારા સોશિયલ મીડિયા X ના સત્તાવાર હેન્ડલ દ્વારા આ જાહેરાત કરવામાં આવી હતી.

આપણ વાંચો: …તો આ દિવસથી દોડશે મુંબઈ મેટ્રો-3ઃ જાણો એક્વાલાઈન વિશે મહત્વના અપડેટ્સ

સંપૂર્ણ કોરિડોર ઓગસ્ટ સુધીમાં કાર્યરત થવાની અપેક્ષા છે, અને વડા પ્રધાન નરેન્દ્ર મોદી પૂર્ણ થયેલા રૂટનું ઉદ્ઘાટન કરે તેવી શક્યતા છે. એકવાર સંપૂર્ણ રીતે કાર્યરત થઈ ગયા પછી, એક્વા લાઇન મુંબઈના રસ્તાઓ પરનો ભાર નોંધપાત્ર રીતે ઘટાડશે અને શહેરના વધુ પડતા ઉપનગરીય રેલવે પરનું દબાણ ઘટાડશે તેવી અપેક્ષા સેવાઈ રહી છે. જોકે, પહેલા તબક્કામાં આ આશા ઠગારી નીવડી હતી.

મેટ્રો લાઇન 3 કોલાબાથી SEEPZ સુધીની છે, જે 33.5 કિમીના પટ અને 27 સ્ટેશનને આવરી લે છે, જેમાંથી 26 ભૂગર્ભ છે. આ લાઇન તેની આધુનિક માળખાગત સુવિધા અને મુંબઈના ટ્રાફિક જામને હળવો કરવાના વચન માટે પ્રશંસા પામી હતી, પણ મોબાઇલ કનેક્ટિવિટીના અભાવે મુસાફરોમાં ભારે નિરાશા ફેલાઈ હતી.