કફ સીરપથી બાળકોના મૃત્યુ: મુંબઈ ગ્રાહક પંચાયતે દેશભરમાં ‘કોલ્ડ્રિફ’ પાછું ખેંચવાની માંગ કરી…
મુંબઈ: ગ્રાહક અધિકાર સંગઠન મુંબઈ ગ્રાહક પંચાયત (એમજીપી)એ શુક્રવારે સેન્ટ્રલ કન્ઝ્યુમર પ્રોટેક્શન ઓથોરિટી (સીસીપીએ) ને વિનંતી કરી છે કે તેઓ દેશભરમાં કોલ્ડ્રિફ અને આવા અન્ય ખતરનાક અને અસુરક્ષિત કફ સિરપને પાછા ખેંચી લેવામાં આવે.
સીસીપીએના ચીફ કમિશનર નિધિ ખરેને લખેલા પત્રમાં, એમજીપીએ મધ્યપ્રદેશ અને રાજસ્થાનમાં ડાયથિલિન ગ્લાયકોલ (ડીઇજી) મિશ્રિત કફ સિરપને કારણે તાજેતરમાં થયેલા બાળકોના મૃત્યુના પ્રતિભાવમાં તાત્કાલિક પગલાં લેવાની માંગ કરી છે.
એમજીપીએ પત્રમાં જણાવ્યું હતું કે, ‘કોલ્ડ્રિફ’ તરીકે માર્કેટિંગ કરાયેલ અને શ્રેસન ફાર્માસ્યુટિકલ્સ દ્વારા ઉત્પાદિત કફ સિરપ, ડીઇજી મિશ્રિત હોવાની પ્રયોગશાળા પુષ્ટિ બાદ ઘણા રાજ્યોમાં પ્રતિબંધિત કરવામાં આવી છે. ડીઇજી એક ઝેરી ઔદ્યોગિક દ્રાવક છે જે કિડની ફેલ્યોર અને મૃત્યુનું કારણ બને છે.
એમજીપીએ ગ્રાહક સુરક્ષા અધિનિયમ ૨૦૧૯ ની કલમ ૨૦(a) હેઠળ આવા શંકાસ્પદ સીરપને તાત્કાલિક રાષ્ટ્રવ્યાપી ફ્રીઝ કરવા અને પાછા ખેંચવાની હાકલ કરી હતી, અને દાવો કર્યો હતો કે આવા જોખમી અને અસુરક્ષિત ઉત્પાદનો ગ્રાહકોના સલામતીના અધિકારને ગંભીર રીતે જોખમમાં મૂકે છે.
ગ્રાહક અધિકાર સંગઠને બાળરોગ ફોર્મ્યુલેશનમાં ડીઇજી ના ઉપયોગ પર સંપૂર્ણ પ્રતિબંધ અને કડક ફાર્માકોવિજિલન્સ પ્રોટોકોલ માટે પણ વિનંતી કરી. તેણે સીસીપીએને રાષ્ટ્રીય ગ્રાહક વિવાદ નિવારણ આયોગમાં ફરિયાદ નોંધાવવા અને મૃતક બાળકોના પરિવાર માટે વળતર મેળવવા માટે પણ કહ્યું.
એમજીપી એ કહ્યું કે આ કોઈ નવી ઘટના નથી કારણ કે જમ્મુ (૨૦૨૦), ગુડગાંવ (૧૯૯૮), અને ચેન્નાઈ (૧૯૭૨), તેમજ ગામ્બિયા અને ઉઝબેકિસ્તાનમાં ડીઇજી-ને કારણે મૃત્યુ થયા છે.
“આ દુર્ઘટના ગ્રાહક સુરક્ષા કાયદામાં સમાવિષ્ટ સલામતીના અધિકારનું ગંભીર ઉલ્લંઘન છે. અમે સીસીપીએ ને નિર્ણાયક રીતે કાર્ય કરવા અને દવા સલામતીમાં જાહેર વિશ્વાસ પુનઃસ્થાપિત કરવા વિનંતી કરીએ છીએ,” એમજીપીના અધ્યક્ષ શિરીષ વી દેશપાંડેએ ભારપૂર્વક જણાવ્યું.
