(અમારા પ્રતિનિધી તરફથી)
મુંબઈ: મુંબઈ મહાનગર પાલિકા પોતાના પ્રસ્તાવિત ગારગાઈ ડેમ પ્રોજેક્ટથી પ્રભાવિત છ ગામોનું પુનર્વસન કરવા માટે તૈયાર છે, જેમાં વાડાના દેવલી ગામ નજીક ૪૦૦ હેક્ટર જમીન પુનઃસ્થાપન માટે નક્કી કરવામાં આવી છે. આગામી તબક્કાના ભાગ રૂપે, સુધરાઇએ જમીન સીમાંકન પ્રક્રિયા શરૂ કરી છે અને સીમાંકન અને અસરગ્રસ્તના પુનર્વસનના કામની દેખરેખ માટે એક સલાહકારની નિમણૂક કરશે.
ગારગાઈ ડેમ પ્રોજેક્ટ, જે મુંબઈના દૈનિક પાણી પુરવઠામાં ૪૪૯ મિલિયન લિટર પ્રતિ દિવસ (MLD) વધારો કરશે છે. આ પ્રોજેક્ટ પાલઘર જિલ્લાના વાડા તાલુકાના બે ગામો – ઓગડા અને ખોડાડે – ને સીધી અસર કરે છે, જેના માટે ૮.૪ ચોરસ કિલોમીટર જમીન સંપાદનની જરૂર પડશે. વધુમાં સુધરાઈ ચાર પડોશી ગામો – પચઘરે, આમલે, ફાસગાંવ અને તિલમલ માંથી પણ જમીન સંપાદન કરવાની યોજના ધરાવે છે, તેને કારણે માનવ વસવાટનો સમગ્ર વિસ્તાર સાફ થઈ જશે.
અધિકારીએ જણાવ્યું હતું કે આ પ્રોજેક્ટ ૬૧૯ પરિવારોને વિસ્થાપિત કરશે, જેનાથી લગભગ ૨,૫૦૦ લોકો પ્રભાવિત થશે. પાલિકાના અધિકારીઓના જણાવ્યા અનુસાર અસરગ્રસ્ત ગ્રામજનોનું સ્થળાંતર કરવામાં આવશે. તે માટે સુધરાઈએ વાડાના દેવલી ગામ નજીક ૪૦૦ હેક્ટર જમીન સંપાદિત કરી છે, જેનું પુનર્વસન માટે સીમાંકન કરવામાં આવશે. નિયુક્ત સલાહકારને સંભવિત જમીનનું ચોક્કસ સીમાંકન કરવાનું અને અસરગ્રસ્ત ગ્રામજનો માટે સંપૂર્ણ પુનર્વસન પ્રક્રિયાનું સંચાલન કરવાનું કામ સોંપવામાં આવશે જેથી સરળ અને અસરકારક પુનર્વસન સુનિશ્ચિત થાય.
આ પ્રોજેક્ટનો ખર્ચ રૂ.૩,૧૦૫ કરોડ થવાનો અંદાજ છે અને નાગરિક સંસ્થાએ નાણાકીય વર્ષ ૨૦૨૫-૨૬ માં રૂ.૩૫.૫૧ કરોડની જોગવાઈ કરી છે. હાલમાં, સુધરાઈ દરરોજ ૩,૯૫૦ મિલિયન લિટર પાણી પૂરું પાડે છે, પરંતુ માંગ વધીને દરરોજ ૪,૪૬૪ એમએલડી થઈ ગઈ છે. ડેમમાં પૂરતો સ્ટોક હોવા છતાં,૩૪% દૈનિક પાણીનું નુકસાન થાય છે. માંગ અને પુરવઠા વચ્ચેના અંતરને દૂર કરવા માટે, સુધરાઈએ અનેક પહેલ શરૂ કરી છે. મહા વિકાસ આઘાડી સરકાર દરમિયાન ૨૦૧૯માં રદ કરાયેલ ગારગાઈ ડેમ પ્રોજેક્ટને શહેરના જળ સંસાધનોને સુધારવા માટે પુનર્જીવિત કરવામાં આવ્યો છે. ગારગાઈ પ્રોજેક્ટ, જે મુંબઈનો આઠમો જળ સ્ત્રોત હશે, તે એક દાયકાથી વધુ સમયથી અટવાઈ પડ્યો છે.
