(અમારા પ્રતિનિધિ તરફથી)
મુંબઈ: અમેરિકાના અલ્બામા રાજ્યના બર્મિંગમમાં તાજેતરમાં સંપન્ન થયેલા વર્લ્ડ પોલીસ ઍન્ડ ફાયર ગેમ્સ ૨૦૨૫માં મુંબઈ મહાનગરપાલિકાના મુંબઈ ફાયરબ્રિગેડના જવાનોએ પહેલા જ દિવસે પહેલો મેડલ જીતીને ઈતિહાસ રચ્યો હતો. મુંબઈ ફાયરબ્રિગેડના છ લોકોની ટુકડી ભારતીય ટીમમાં જોડાઈ હતી.
અમેરિકામાં ૨૮ જૂનથી છ જુલાઈ, ૨૦૨૫ દરમ્યાન યોજાયેલી સ્પર્ધામાં ૭૦થી વધુ દેશના પાંચ હજારથી વધુ ખેલાડીઓએ ભાગ લીધો હતો. સ્પર્ધકોએ ૬૦થી વધુ પ્રકારની રમત અને ડ્રિલ સ્પર્ધામાં ભાગ લીધો હતો. ભારતમાંથી ૪૭ ફાયરબ્રિગેડના અધિકારી અને કર્મચારીઓએ સ્પર્ધામાં ભાગ લીધો હતો, તેમાં મુંબઈ ફાયરબ્રિગ્રેડના છ લોકોનો સમાવેશ થાય છે.
આ સ્પર્ધામાં ભારતે કુલ ૫૮૮ મેડલ જીતીને ત્રીજો નંબરે સ્થાન મેળવ્યું હતું, તેમાં ૨૮૦ ગોલ્ડ, ૧૭૮ સિલ્વર અને ૧૩૦ બ્રોન્ઝ મેડલનો સમાવેશ થાય છે. મુંબઈ ફાયરબ્રિગેડના ડૉ. દીપક ઘોષે બ્રોન્ઝ, ઉન્નતી ચિલકેવારે સિલ્વર અને શ્ર્વેતા દવણેએ સિલ્વર મેડલ જીત્યો હતો.
