મુંબઈની નાળાસફાઈમાં એઆઈ ટેકનોલોજી અને રોબોટ્સનો ઉપયોગ…

(અમારા પ્રતિનિધિ તરફથી)
મુંબઈ: મુંબઈ શહેર અને ઉપનગરોમાં તમામ નાળાની સફાઈના કામો ચાલી રહ્યા છે. નાયબ મુખ્ય પ્રધાન એકનાથ શિંદેએ મ્યુનિસિપલ વહીવટીતંત્રને 7 જૂન સુધીમાં કામ પૂર્ણ કરવાનો નિર્દેશ આપ્યો હતો. તેમણે એવો પણ નિર્દેશ આપ્યો હતો કે, ગટરમાંથી કાઢવામાં આવેલો ગાળ 48 કલાકની અંદર દૂર કરવામાં આવે અને જણાવ્યું હતું કે જે અધિકારીઓ સમયસર કામ પૂર્ણ નહીં કરે અને ગટરની સફાઈના કામમાં બેદરકારી દાખવશે તેમની સામે કાર્યવાહી કરવામાં આવશે.

એકનાથ શિંદેએ બપોરે 2 વાગ્યાની આસપાસ ગટર સફાઈ કાર્યનું નિરીક્ષણ શરૂ કર્યું. તેમણે ઉષા નગર, ભાંડુપમાં ઉષા કોમ્પ્લેક્સ, વડાલામાં નેહરુ નગર નાળા અને દાદરમાં ધારાવી ટી જંકશન નજીક નાળાની સફાઈનું નિરીક્ષણ કર્યું. નાયબ મુખ્ય પ્રધાન શિંદેએ જણાવ્યું હતું કે વરસાદ સમયસર શરૂ થયો હોવા છતાં નાળાની સફાઈ સમયસર પૂર્ણ કરવાની સૂચનાઓ આપવામાં આવી છે. અત્યાર સુધીમાં, 85 ટકા મોટા નાળા અને 65 ટકા નાના નાળા સાફ થઈ ગયા છે, અને હજુ 15 દિવસ બાકી છે. તેથી આ કાર્ય સમયસર પૂર્ણ થશે એવો વિશ્ર્વાસ તેમણે વ્યક્ત કર્યો હતો.

મુંબઈ મ્યુનિસિપલ કોર્પોરેશન અને રેલવે વહીવટીતંત્ર સાથે સંકલનમાં ડ્રેઇન સફાઈ ચાલી રહી છે. આ માટે એઆઈ ટેકનોલોજીનો ઉપયોગ કરવામાં આવી રહ્યો છે. રેલવે કલ્વર્ટ નીચેનો કચરો રોબોટની મદદથી સાફ કરવામાં આવી રહ્યો છે. મહાનગરપાલિકા દર વર્ષે પાણી ભરાતા વિસ્તારોને ઓળખી કાઢે છે અને 422 સ્થળોએ પંપ સ્થાપિત કર્યા છે, જ્યારે બે સ્થળોએ અને 10 સ્થળોએ હોલ્ડિંગ ટૅન્ક અને નાના પમ્પિંગ સ્ટેશનો કાર્યરત કરવામાં આવ્યા છે.

તેમણે વિક્રોલીના સૂર્યનગરના ભૂસ્ખલન-સંભવિત વિસ્તારની મુલાકાત લીધી અને મ્યુનિસિપલ કોર્પોરેશનને ત્યાં રક્ષણાત્મક જાળી લગાવવાનો નિર્દેશ આપ્યો હતો. તેમણે સંબંધિત અધિકારીઓને સ્થાનિક લોકોને સલામત સ્થળે ખસેડવા નિર્દેશ આપ્યો હતો કારણ કે અહીં દર વર્ષે અકસ્માતો થાય છે.