મુંબઈમાં મહિલાઓ સુરક્ષિત છે કે નહીં, આંકડાઓ જાણશો તો ચોંકી જશો, જાણો વાસ્તવિકતા
મુંબઈઃ સામાન્ય રીતે મુંબઈ એક સલામત શહેરની છાપ ધરાવે છે. અડધી રાત્રે અહીં એકલા નીકળવામાં ભય કે અસલામતી લગતી નથી તેવું મુંબઈગરાં ગર્વથી કહે છે. પણ વાસ્તવિકતાઓ ચોંકાવનારું ચિત્ર રજૂ કરી રહે છે.
મુંબઈના લાંબા સમયથી ચાલતા “સલામત શહેર”ના સૂત્ર પર વધુને વધુ પ્રશ્નાર્થ લાગી રહ્યો છે. મુંબઈ પોલીસ દ્વારા જાહેર કરાયેલા તાજેતરના આંકડા અનુસાર ૨૦૨૫ના પ્રથમ સાત મહિનામાં મહિલાઓ વિરુદ્ધના ગુનાઓમાં લગભગ ૧૨ ટકાનો વધારો થયો છે, જે મહિલાઓની સલામતી અંગે નવી ચિંતાઓ ઊભી કરે છે.
પોલીસ અહેવાલો મુજબ ગયા વર્ષે ૩૧૭ બળાત્કારના કેસ નોંધાયા હતા, જેમાં ૧૧ ટકાનો વધારો હતો. આમાંથી ૩૪૬ કેસોની તપાસ પહેલાથી જ પૂર્ણ થઈ ગઈ છે, જે પોલીસની કાર્યક્ષમતા દર્શાવે છે, પરંતુ સંખ્યામાં વધારો ચિંતાજનક છે. મહિલાઓના અપહરણના કેસ ગયા વર્ષે ૬૯૭થી વધીને ૮૨૨ થયા છે, જે ૧૮ ટકાનો વધારો દર્શાવે છે. છેડતીના કેસ પણ વધીને ૫૧૫ થયા છે, જે ૨૦૨૪માં ૩૮૪ હતા, જે જાહેર સ્થળોએ મહિલાઓ માટે વધતા જોખમો દર્શાવે છે.
આ પણ વાંચો: બિહારમાં ચૂંટણી પહેલાં લહાણીઃ મોદી આજે 75 હજાર મહિલાઓના ખાતામાં 10-10 હજાર કરશે ટ્રાન્સફર
પોક્સો એક્ટ હેઠળ નોંધાયેલા કેસ હજુ પણ ચિંતાજનક સ્તરે છે. આત્મહત્યા માટે ઉશ્કેરણી અને વૈવાહિક ક્રૂરતાના કેસ ૨૭૧ હતા, જે ગયા વર્ષના ૨૮૯ કરતા થોડા ઓછા હતા. આ ઉપરાંત, માનસિક સતામણીના ૨૬૮ અલગ અલગ કેસ નોંધાયા હતા, જે પાછલા વર્ષની સરખામણીમાં વધારો દર્શાવે છે. શહેરમાં આ વર્ષે અત્યાર સુધીમાં એસિડ હુમલાના ૫ અને દહેજ મૃત્યુના ૫ કેસ પણ જોવા મળ્યા છે. જોકે આ આંકડા પાછલા વર્ષો જેવા જ છે.
આ પણ વાંચો: મહિલાઓ માટે ‘મિસાલ’ બનનારા એશિયાના સૌપ્રથમ મહિલા ડ્રાઈવર સુરેખા યાદવ નિવૃત્ત થશે
જુલાઈ ૨૦૨૫ સુધીમાં મહિલાઓ વિરુદ્ધના ગુનાઓના કુલ ૩,૯૨૦ કેસ નોંધાયા હતા, જે ૨૦૨૪ ના સમાન સમયગાળા દરમિયાન ૩,૫૦૦ હતા. પોલીસે લગભગ ૯૪ ટકા કેસમાં તપાસ પૂર્ણ કરી છે, પરંતુ એકંદર વધારો દર્શાવે છે કે કટોકટીને કાબુમાં લેવા માટે માત્ર અમલીકરણ પૂરતું નથી. પોલીસ તેમની ઝડપી તપાસ માટે શ્રેયને પાત્ર છે, પણ મહિલાઓની સલામતી પ્રત્યે સમાજની માનસિકતાનો મોટો મુદ્દો હજુ પણ ઉકેલાયો નથી.
મુંબઈમાં મહિલાઓની સલામતી સુનિશ્ચિત કરવા માટે સરકાર, પોલીસ અને નાગરિક સમાજ માટે મજબૂત, વધુ અસરકારક અને સંવેદનશીલ નીતિઓ લાગુ કરવા માટે સાથે મળીને કામ કરવાનો સમય આવી ગયો છે. મુંબઈની લોકલ ટ્રેન હોય કે જાહેર સ્થળોએ પણ મહિલાઓ પરના ગુનામાં વધારો થઈ રહ્યો છે, જે ચિંતાજનક વાત છે, એમ નિષ્ણાતોએ જણાવ્યું હતું.
