મુંબઈ: રાજ્ય પરિવહન નિગમ (એસટી)ના કાફલામાં આઠ હજાર નવી બસો ઉમેરવામાં આવશે. આ કારણે, એસટી નિગમને માનવશક્તિની જરૂર પડશે. આ માટે, કરાર ધોરણે 17,450 ડ્રાઇવર અને સહાયકનાં પદો માટે ભરતી પ્રક્રિયા અમલમાં મૂકવામાં આવશે અને ટેન્ડર પ્રક્રિયા બીજી ઓક્ટોબરથી શરૂ થશે.
રાજ્યના હજારો બેરોજગાર યુવાનોને આ ભરતી પ્રક્રિયા દ્વારા રોજગારી પૂરી પાડવામાં આવશે. તેમને લઘુત્તમ 30,000 રૂપિયા પગાર મળશે. પરિવહન પ્રધાન અને એસટી નિગમના અધ્યક્ષ પ્રતાપ સરનાઇકે આ તકનો લાભ લેવા ઇચ્છુક યુવાનોને અપીલ કરી છે.
મહારાષ્ટ્ર રાજ્ય માર્ગ પરિવહન નિગમની 300મી બોર્ડ બેઠકમાં લેવાયેલા નિર્ણય મુજબ, સરળ બસ સેવાઓ જાળવવા માટે કરાર આધારિત ત્રણ વર્ષ માટે જરૂરી ડ્રાઇવરો અને સહાયકોને રાખવા માટે ઇ-ટેન્ડર પ્રક્રિયા અપનાવવામાં આવી રહી છે. આ ઇ-ટેન્ડર પ્રક્રિયા છ પ્રાદેશિક વિભાગોમાં લાગુ કરવામાં આવશે.
પ્રક્રિયા પૂર્ણ થયા પછી, માનવશક્તિ પૂરી પાડતી સંસ્થાઓ તરફથી જરૂરી માનવશક્તિ સમયસર રાજ્ય પરિવહન નિગમને ઉપલબ્ધ થશે. કરાર આધારિત ભરતી કરાયેલા ડ્રાઇવર અને સહાયક ઉમેદવારોને લગભગ 30,000 રૂપિયાનો પગાર આપવામાં આવશે.
આ સાથે, ઉમેદવારોને એસટી દ્વારા તાલીમ આપવામાં આવશે. સરનાઇકે વિશ્ર્વાસ વ્યક્ત કર્યો હતો કે બસોની વધતી સંખ્યા અને જરૂરી માનવશક્તિ પછી, મુસાફરોને અવિરત, સલામત અને ગુણવત્તાયુક્ત બસ સેવાઓ પૂરી પાડવાનું શક્ય બનશે.
આ પણ વાંચો…Good News: MSRTC મહિનામાં બસ-ટ્રેકિંગ એપ્લિકેશન લોન્ચ કરશે
