મુંબઈ: વસઈ પૂર્વમાં ધુમાળનગર પરિસરમાં શનિવારે વહેલી સવારના એક વિદ્યુત ઉપકરણો તૈયાર કરતા કારખાનામાં ભીષણ આગ ફાટી નીકળી હતી. વહેલી સવારના ચાર વાગે લાગેલી આગ પર ભારે જહેમત બાદ નિયંત્રણ મેળવવામાં સફળતા મળી હતી. જોકે આગમાં લાખો રૂપિયાની કિંમતનો માલસામાન બળીને ખાખ થઈ ગયો હતો.
વસઈ પૂર્વમાં વાલીવમાં ધુમાળનગર પરિસરમાં ઈંટરટેક ટેક્નોલોજી પ્રાઈવેટ લિમિટેડ નામની કંપની એલઈડી વિદ્યુત ઉપકરણો તૈયાર કરે છે. શનિવારે સવારના ચાર વાગ્યાની આસપાસ કારખાનામાં આગ લાગ્યા બાદ પરિસરમાં ખળભળાટ મચી ગયો હતો.
કારખાનામાં આગ લાગ્યા બાદ ફાયરબ્રિગેડ ઘટના સ્થળે પહોંચી ગઈ હતી અને આગ પર નિયંત્રણ મેળવવાના પ્રયાસ હાથ ધર્યા હતા. જોકે કારખાનામાં પ્લાસ્ટિકનો કાચો માલ અને વિદ્યુત ઉપકરણો તૈયાર કરવા માટેનો સામાન હોવાથી આગ ઝડપભેર ફેલાઈ ગઈ હતી. તેથી ફાયરબિગ્રેડને આગ પર નિયંત્રણ મેળવવામાં ભારે જહેમત ઉઠાવી પડી હતી. લગભગ ત્રણથી ચાર કલાકના પ્રયાસ બાદ આગ નિયંત્રણમાં આવી હતી પણ મોડે સુધી કુલિંગ ઓપેરશન ચાલ્યું હતું.
આ પણ વાંચો…દહિસરમાં બિલ્ડિંગમાં આગ: કોઈ જાનહાનિ નહીં
