(અમારા પ્રતિનિધિ તરફથી)
મુંબઈ: મહારાષ્ટ્ર સરકારનો પહેલા ધોરણથી શાળાઓમાં હિન્દી દાખલ કરવાનો નિર્ણય ભાજપ-આરએસએસ દ્વારા બંધારણમાં સમાવિષ્ટ મરાઠીને બાજુ પર રાખવા અને ભાષાકીય વિવિધતાને દૂર કરવાનું કાવતરું છે, એવો આક્ષેપ રાજ્ય કોંગ્રેસના વડા હર્ષવર્ધન સપકાળે શનિવારે કર્યો હતો.
‘આ ફક્ત ભાષા નીતિ વિશે નથી. ભાજપ-આરએસએસનો એજન્ડા અન્ય બધી ભાષાઓને ભૂંસી નાખવાનો અને સમગ્ર દેશમાં હિન્દી વર્ચસ્વ લાદવાનો છે, પરંતુ અમે મરાઠીને દબાવવા દઈશું નહીં. આ કપટી યોજનાને હરાવવામાં આવશે. અમે હિન્દીને એક ભાષા તરીકે માન આપીએ છીએ, પરંતુ બળજબરી અસ્વીકાર્ય છે. મરાઠી ફક્ત આપણી ભાષા નથી. તે આપણી ઓળખ અને જીવનશૈલી છે,’ એમ સપકાળે પત્રકારોને જણાવ્યું હતું.
તેમણે કહ્યું હતું કે કોંગ્રેસે પત્રો દ્વારા અગ્રણી સાહિત્યકારોનો સંપર્ક કર્યો છે જેમાં તેમને રાજ્ય સરકારને હિન્દી પરના આદેશને રદ કરવા માટે દબાણ કરવા માટે સંયુક્ત મોરચો બનાવવા જણાવ્યું છે. શાસક ભાજપ પર બેવડા ધોરણ અપનાવવાનો આરોપ લગાવતાં, સપકાળે સવાલ કર્યો હતો કે પડોશી ગુજરાતમાં હિન્દી ફરજિયાત ભાષા કેમ નથી?
‘મુખ્ય પ્રધાન દેવેન્દ્ર ફડણવીસ અને (પ્રધાન) ચંદ્રશેખર બાવનકુળેએ આ બેવડા ધોરણો વિશે બોલવું જોઈએ,’ એમ તેમણે કહ્યું હતું.સપકાળે કહ્યું હતું કે સમાજના તમામ વર્ગોએ હિન્દી હુકમ સામે વિરોધમાં ભાગ લેવો જોઈએ કારણ કે તે ‘સાંસ્કૃતિક સંઘર્ષ છે, ફક્ત રાજકીય લડાઈ નથી.’
