માલવણી લઠ્ઠાકાંડના ચાર દોષિતને ૧૦ વર્ષની સખત કેદની સજા
મુંબઈઃ અહીંની એક અદાલતે બુધવારે ૨૦૧૫ની લઠ્ઠાકાંડ દુર્ઘટનામાં ચાર દોષિતને ૧૦ વર્ષની સખત કેદની સજા ફટકારી હતી, જેમાં મુંબઈના માલવાણી વિસ્તારમાં ૧૦૦થી વધુ લોકોએ જીવ ગુમાવ્યા હતા.
ચાર દોષિતોની ઓળખ રાજુ તાપકર, ડોનાલ્ડ પટેલ, ફ્રાન્સિસ ડીમેલો અને મન્સૂર ખાન તરીકે થઈ હતી. કોર્ટે ૨૮મી એપ્રિલે તેમને ભારતીય દંડ સંહિતાની કલમ હેઠળ ગુનાહિત ષડયંત્ર અને હત્યા ન હોય તેવી દોષિત હત્યા તેમજ બોમ્બે પ્રોહિબિશન એક્ટની કલમ હેઠળ દોષિત ઠેરવ્યા હતા. જોકે, તેણે આ કેસમાં અન્ય ૧૦ આરોપીને નિર્દોષ જાહેર કર્યા હતા કેમકે ફરિયાદ પક્ષ આ કેસમાં તેમની ભૂમિકા સાબિત કરવામાં નિષ્ફળ ગયો હતો.
જૂન ૨૦૧૫માં મુંબઈના પશ્ચિમી ઉપનગર મલાડમાં માલવાણી ખાતે લક્ષ્મી નગર ઝૂંપડપટ્ટીમાં નકલી દારૂ પીવાથી ૧૦૦ થી વધુ લોકોના મોત થયા હતા. બુધવારે વધારાના સેશન્સ જજ સ્વપ્નિલ તવશીકરે સજા જાહેર કરતી વખતે કહ્યું હતું કે આરોપીઓને છૂટછાટ આપવા માટે તેમની સમક્ષ કોઈ કારણો નથી.
આથી, આરોપીઓને ૧૦ વર્ષની સખત કેદની સજા ફટકારવામાં આવે છે. તેમની દલીલો દરમિયાન, વિશેષ સરકારી વકીલ પ્રદિપ ઘરતે કહ્યું હતું કે આ એક ખૂબ જ ગંભીર ગુનો છે જેમાં ૧૦૬ લોકો મૃત્યુ પામ્યા હતા, તેથી આરોપીઓને મહત્તમ સજા થવી જોઈએ. સજા અનુકરણીય હોવી જોઈએ, જેથી કરીને તે સમાજને મજબૂત સંદેશ આપે અને લોકોને આવા ગુનાઓ કરતા અટકાવે.
આ પણ વાંચો : સિંગર સાથે 68 લાખ રૂપિયાની છેતરપિંડી
ટ્રાયલ દરમિયાન ફરિયાદ પક્ષે એક સાક્ષીની તપાસ કરી હતી, જેણે દારૂ વેચવામાં તાપકરને મદદ કરી હતી. કેસના અન્ય સાક્ષીઓએ કોર્ટને તે સ્થળ વિશે જણાવ્યું હતું જ્યાં તેઓએ દારૂ પીધો હતો. ફરિયાદ પક્ષે પીડિત પૈકીના એકનું મૃત્યુનું ઘોષણાપત્ર પણ રજૂ કર્યું હતું, જેણે તાપકરને ત્યાં દારૂ પીધો હતો.
પોલીસે ગેરકાયદે દારૂ સાથે આંશિક રીતે ભરેલો ડબ્બો પણ મેળવ્યો હતો અને પીડિતોની જુબાની પણ હતી, જેમણે આંખો ગુમાવી હતી. મલાડના માલવાણી વિસ્તારમાં નકલી દારૂ પીવાથી ઓછામાં ઓછા ૧૦૬ લોકોના મોત થયા હતા.
