આર્થિક રોકાણની લાલચે કર્ણાટકના વેપારીને બાનમાં રાખી 2.17 કરોડ રૂપિયા વસૂલ્યા
મુંબઈ: કર્ણાટકના વેપારીને તેના વ્યવસાયમાં આર્થિક રોકાણને બહાને મીરા રોડમાં બોલાવ્યા પછી ત્રણ દિવસ સુધી બંધક બનાવીને 2.17 કરોડ રૂપિયા વસૂલવામાં આવ્યા હોવાની આંચકાજનક ઘટના પ્રકાશમાં આવી હતી. રોકાણકારની જરૂર હોવાથી મીરા રોડ આવેલા વેપારીને બે અલગ અલગ હોટેલની રૂમમાં પિસ્તોલ અને ચાકુની ધાકે બાનમાં લેવાયો હતો.
કર્ણાટકના શિમોગા જિલ્લામાં રહેતા શમંતકુમાર શડક શરપ્પા કરડેરે (31) નોંધાવેલી ફરિયાદને આધારે કાશીમીરા પોલીસે અંકિત અને બે અજાણ્યા શખસ વિરુદ્ધ ગુનો નોંધ્યો હતો. પોલીસ બન્ને હોટેલમાં લાગેલા સીસીટીવી કૅમેરાનાં ફૂટેજને આધારે આરોપીઓની શોધ ચલાવી રહી છે.
આપણ વાચો: વ્યાજના રૂપિયા પડાવવા વ્યાજખોરોની પઠાણી ઉઘરાણી, પોલીસે 5 આરોપીની ધરપકડ કરી…
પોલીસ ફરિયાદ અનુસાર ફરિયાદીએ ગયા વર્ષે જ વ્યવસાય શરૂ કર્યો હોવાથી તેને રોકાણકારોની જરૂર હતી. એમાં 13 ડિસેમ્બરે અંકિત નામના શખસે ફરિયાદીને વ્હૉટ્સઍપ કૉલ કર્યો હતો. ફરિયાદીના વ્યવસાયમાં રોકાણ કરવાની પોતાની ઇચ્છા હોવાનું અંકિતે કહ્યું હતું. આ અંગે ચર્ચા કરવા ફરિયાદીને મીરા રોડ આવવાનું કહેવામાં આવ્યું હતું.
ફરિયાદી 15 ડિસેમ્બરે મીરા રોડ પહોંચ્યો ત્યારે તેને એક થ્રી સ્ટાર હોટેલમાં બોલાવવામાં આવ્યો હતો. હોટેલની રૂમમાં પહોંચેલા ફરિયાદી સાથે અમુક ચર્ચા કર્યા પછી આરોપીએ કંપનીના બૅન્ક ખાતાની વિગતો અને પાસવર્ડ આપવાનું કહ્યું હતું. ફરિયાદીએ ખાતાની વિગતો અને પાસવર્ડ આપવાનો ઇનકાર કરતાં તેને પિસ્તોલ અને ચાકુની ધાકે બે શખસે બાનમાં લીધા હતા.
ફરિયાદીની મારપીટ કરી તેનો મોબાઈલ ફોન ઝૂંટવી લેવામાં આવ્યો હતો. ફોનમાંથી બૅન્ક વિગતો અને પાસવર્ડ પ્રાપ્ત કરી આરોપીઓએ 2.17 કરોડથી વધુ રૂપિયા અલગ અલગ બૅન્ક ખાતાંમાં ટ્રાન્સફર કર્યા હતા. બાદમાં ફરિયાદીને બીજી હોટેલમાં લઈ જવાયો હતો, જ્યાંની રૂમમાં પણ તેને ધમકાવીને બંધક બનાવાયો હતો.
આપણ વાચો: પવઇ બંધક ડ્રામા: રોહિત આર્યએ 80,000 શાળાઓમાંથી ગેરકાયદે ચાર કરોડ રૂપિયા એકઠા કર્યા હતા…
કહેવાય છે કે અંકિત બાથરૂમમાં ગયો હતો ત્યારે તેના સાથી ફોન પર વાત કરતાં હોટેલ લૉબીથી દૂર ગયા હતા. તક ઝડપી ફરિયાદી રૂમમાંથી છટકી ગયો હતો અને બોરીવલી પહોંચ્યો હતો. ત્યાંથી કુર્લા અને પછી નવી મુંબઈ પહોંચી કર્ણાટક ગયો હતો. ડરી ગયેલા ફરિયાદીએ બે દિવસ બાદ નજીકના પોલીસ સ્ટેશનનો સંપર્ક સાધ્યો હતો.
જોકે ગુનો કાશીમીરા પોલીસની હદમાં બન્યો હોવાથી ફરિયાદીને ત્યાં ફરિયાદ નોંધાવવાની સૂચના અપાઈ હતી. ડરના માર્યા ફરિયાદીએ થોડા દિવસ પછી મહારાષ્ટ્ર પોલીસના સિટીઝન પોર્ટલ પર ફરિયાદ કરી હતી, જેને કારણે તેને કાશીમીરા પોલીસ સ્ટેશને બોલાવાયો હતો.
