મુંબઈ: ગોરેગામમાં 22 વર્ષની ઇન્સ્ટા ઇન્ફ્લ્યુએન્સરનો વિનયભંગ કરીને ફરાર થયેલા 27 વર્ષના યુવકને પોલીસે ઝડપી પાડી લોકઅભેગો કરી દીધો હતો. યુવકની ઓળખ કુલદીપ બુધીરામ કનોજિયા તરીકે થઇ હોઇ તે મૂળ ઉત્તર પ્રદેશનો વતની છે અને ગોરેગામ પશ્ર્ચિમના ઉદ્યોગનગરમાં પ્લાસ્ટિકની ફેક્ટરીમાં કામ કરે છે.
પોલીસે ઘટનાસ્થળ તેમ જ આસપાસના વિસ્તારમાંના 80થી વધુ સીસીટીવી કેમેરાના ફૂટેજ તપાસ્યા હતા અને તેને આધારે આરોપીને શોધી કાઢ્યો હતો. ફરિયાદી યુવતી 26 નવેમ્બરના રોજ ગોરેગામ પશ્ર્ચિમમાં રેડીસન હોટેલની નજીકના બસ સ્પોટ પાસેથી પગપાળા જઇ રહી હતી ત્યારે પાછળથી આવેલા આરોપીએ તેનો વિનયભંગ કર્યો હતો અને બાદમાં ઘટનાસ્થળેથી ફરાર થઇ ગયો હતો.
આપણ વાચો: સગીરાનો વિનયભંગ કરનારો યુવક પકડાયો: પોલીસે 20 કલાકમાં આરોપનામું દાખલ કર્યું
આ ઘટનાથી ગભરાયેલી ફરિયાદીએ તાત્કાલિક પોલીસ ક્ધટ્રોલ રૂમને કૉલ કરવાનો પ્રયાસ કર્યો હતો, પણ કૉલ લાગ્યો નહોતો. આથી ફરિયાદીએ તેની માતાને કૉલ કરી ઘટનાની જાણ કરી હતી. બાદમાં તેણે સમગ્ર ઘટનાની માહિતી સોશિયલ મીડિયા પર શૅર કરી હતી.
તેની સોશિયલ મીડિયા પોસ્ટ વાયરલ થયા બાદ પોલીસ હરકતમાં આવી હતી અને આરોપીને પકડવા માટે ત્રણ ટીમ તૈયાર કરાઇ હતી. પોલીસની ટીમે 80થી વધુ સીસીટીવી ફૂટેજ તપાસ્યા હતા અને આરોપીને 24 કલાકમાં ગોરેગામના ઉદ્યોગનગરથી શોધી કાઢ્યો હતો. પૂછપરછમાં આરોપીએ ગુનાની કબૂલાત કરી હતી.
