ટ્રાફિકના નિયમોનો ભંગ કરનારા પાસેથી કરોડો રુપિયા વસૂલવા સરકાર આ માર્ગ અપનાવશે
મુંબઈ: રાજ્યમાં ૪૨.૮૯ મિલિયન ટ્રાફિક ભંગ કરનારાઓ પાસેથી ₹ ૨,૪૨૯ કરોડની જંગી રકમ વસુલવાની બાકી છે. બાકી રકમ વસૂલવા, રાજ્ય સરકારે કેન્દ્ર સરકારને વાહનચાલકોના બેંક ખાતા સાથે બાકી ઈ-ચલાનને લિંક કરવાની પરવાનગી માટે પત્ર લખ્યો છે.
જાન્યુઆરી ૨૦૧૯માં ઈ-ચલાન અસ્તિત્વમાં આવ્યા પછી, છેલ્લા પાંચ વર્ષમાં હેન્ડહેલ્ડ ઉપકરણો અને સીસીટીવી નેટવર્કનો ઉપયોગ કરીને ટ્રાફિક પોલીસ દ્વારા ઈ-ચલાન દ્વારા ટ્રાફિક ઉલ્લંઘન બદલ ૭,૫૩,૩૬,૨૨૪થી વધુ વાહનચાલકોને ₹૩,૭૬૮ કરોડ દંડ કરવામાં આવ્યો હતો, પરંતુ મોટરચાલકોએ માર્ચ ૨૦૨૪ સુધી માત્ર ₹ ૧,૩૩૯ કરોડ અથવા ૩૫ ટકા ચૂકવ્યા છે. વાહનચાલકોને ઓવર-સ્પીડિંગ, લેન-કટીંગ અને સિગ્નલ ઉલ્લંઘન માટે ઈ-ચલાન જારી કરવામાં આવે છે.
અનેક ઝુંબેશ છતાં, રાજ્ય સરકાર બાકી રકમની વસૂલાત કરવામાં અસમર્થ રહી છે, પરિણામે રાજ્યના પરિવહન વિભાગે વાહનચાલકોના બેંક ખાતાઓ સાથે ઈ-ચલાનને લિંક કરવાની પરવાનગી માટે કેન્દ્ર સરકારને પત્ર લખ્યો છે. બેંકિંગ એક્ટ કેન્દ્ર સરકારનો વિષય હોવાથી બેંક ખાતાઓને લિંક કરવા માટે તેની મંજૂરીની જરૂર છે .
પરિવહન વિભાગના એક અધિકારીએ જણાવ્યું હતું કે ફાસ્ટેગ અને વાર્ષિક મોટર વીમાની ચુકવણી માટે જોડાયેલ બેંક એકાઉન્ટ સાથે ઈ-ચલાન લિંક કરવામાં આવશે. જ્યારે પણ મોટરચાલક તેના ફાસ્ટેગને ટોપ-અપ કરવાનો અથવા તેના વાહનનો વીમો ચૂકવવાનો પ્રયાસ કરશે ત્યારે અમે બાકી રકમ વસૂલી શકીશું. રાજ્યના પરિવહન વિભાગના અન્ય એક અધિકારીએ જણાવ્યું હતું કે મોટા ભાગની બાકી રકમ ખાનગી કાર માલિકોની છે.
