(અમારા પ્રતિનિધિ તરફથી)
મુંબઈ: મુંબઈના છત્રપતિ શિવાજી મહારાજ ઈન્ટરનૅશનલ ઍરપોર્ટ પર બૅન્ગકોકથી આવેલા અમદાવાદના રહેવાસીની ધરપકડ કરી તેની પાસેથી અંદાજે 9.66 કરોડ રૂપિયાનો ઉચ્ચ ગુણવત્તાનો ગાંજો જપ્ત કરવામાં આવ્યો હતો. કસ્ટમ્સ વિભાગના ઍર ઈન્ટેલિજન્સ યુનિટે (એઆઈયુ) પકડી પાડેલા પ્રવાસીની ઓળખ મોહમ્મદ રુહાન શેખ (31) તરીકે થઈ હતી. અમદાવાદના શાહપુર ખાતેના પિકોક એપાર્ટમેન્ટમાં રહેતો શેખ ઝટપટ નાણાં કમાવાની લાલચે ગાંજાની તસ્કરીમાં સંડોવાયો હોવાનું અધિકારીએ જણાવ્યું હતું.
ઈન્ડિગો ઍરલાઈન્સની ફ્લાઈટમાં બૅન્ગકોકથી આવનારા શેખ પાસે પ્રતિબંધિત ડ્રગ્સ હોવાની માહિતી એઆઈયુના અધિકારીને મળી હતી. માહિતીને આધારે શનિવારની રાતે મુંબઈના ઍરપોર્ટ પર પહોંચેલા શેખને આંતરવામાં આવ્યો હતો.
શેખ પાસેની કાળા રંગની ટ્રોલી બૅગની તપાસ કરવામાં આવી હતી. બૅગમાંથી પ્લાસ્ટિકની થેલીનાં 20 પૅકેટ્સ મળી આવ્યાં હતાં. અધિકારીઓએ ફીલ્ડ ટેસ્ટિંગ કિટથી તપાસ કરતાં પૅકેટ્સમાં હાઈડ્રોપોનિક ગાંજો હોવાની ખાતરી થઈ હતી.
આરોપી પાસેથી અંદાજે 9.66 કરોડ રૂપિયાનો 9,662 ગ્રામ ગાંજો જપ્ત કરવામાં આવ્યો હતો. તેની વિરુદ્ધ એનડીપીએસ ઍક્ટ હેઠળ ગુનો નોંધવામાં આવ્યો હતો. આરોપી ભારતમાં કોને ગાંજો આપવાનો હતો તેની તપાસ કરવામાં આવી રહી હોવાનું અધિકારીએ જણાવ્યું હતું.
આ પણ વાંચો : એરપોર્ટ પર પ્રવાસી પાસે 45 પ્રાણી મળ્યાં: ગૂંગળામણથી અમુકનાં મૃત્યુ
