નાતાલ અને નવા વર્ષને લઈ બેકરી-કેક શોપની સઘન તપાસ: FDAએ હાથ ધરશે સ્પેશિયલ અભિયાન
મુંબઈ: નાતાલ અને નવા વર્ષના સ્વાગતને ખલેલ પહોંચે નહીં તેના માટે ફૂડ એન્ડ ડ્રગ એડમિનિસ્ટ્રેશન (એફડીએ) દ્વારા બેકરીઓ, કેક શોપ્સ અને દુકાનોની તપાસ માટે વિશેષ અભિયાન હાથ ધરવામાં આવશે.
આ અભિયાનમાં હોટેલ, કેક શોપ્સ, ફાસ્ટ ફૂડ જોઈન્ટ્સ અને ખાણીપીણીની દુકાનોમાં ખાદ્યપદાર્થોની તપાસ કરવામાં આવશે. બાર અને રેસ્ટોરાંમાં પણ ખાદ્યપદાર્થોની તપાસ માટે ૩૧ ડિસેમ્બર સુધી દરોડા પાડવામાં આવશે અને આ માટે ખાસ નિરીક્ષણ ટીમોની રચના કરવામાં આવી છે.
આપણ વાચો: અઢી કરોડ મુંબઈગરાની ફૂડ સેફ્ટી છે ભગવાન ભરોસે…
નાતાલ અને નવા વર્ષની ઉજવણી દરમિયાન ખાણીપીણીની વધતી માંગને ધ્યાનમાં રાખીને બેકરી, હોટેલ અને ફાસ્ટ ફૂડ જોઈન્ટ્સના સંચાલકો દ્વારા ખોરાકમાં ભેળસેળ થવાની સંભાવના વધારે હોય છે, જેના કારણે નાગરિકોને નબળી ગુણવત્તાનો ખોરાક મળવાની શક્યતા છે.
આને ધ્યાનમાં રાખીને એફડીએ આ ખાદ્ય વિક્રેતાઓ પાસે લાઇસન્સ, કારીગરોના તબીબી તપાસ રિપોર્ટ, ખોરાક તૈયાર કરવા માટે વપરાતા પાણીનો ગુણવત્તા રિપોર્ટ, ખાદ્ય વસ્તુઓનું રિસાયક્લિંગ, ખોરાકની ગુણવત્તા, પેકેજિંગ વગેરે છે કે કેમ તેનું નિરીક્ષણ કરશે.
આપણ વાચો: મુંબઈના પ્રખ્યાત ફૂડ જોઈન્ટ પર FDAના દરોડા
આ ઉપરાંત, એફડીએ અધિકારીઓ વિવિધ વાનગીઓ બનાવવા માટે ઉપયોગમાં લેવાતી પનીર, બટર, ચિકન, મટન વગેરે જેવી વસ્તુઓની ગુણવત્તા તપાસશે.
દરમિયાન, એફડીએની ટીમ ૩૧ ડિસેમ્બર સુધી વિવિધ સંસ્થાઓ પર અચાનક દરોડા પણ પાડશે, એમ ફૂડ એન્ડ ડ્રગ એડમિનિસ્ટ્રેશન પ્રધાન નરહરિ જીરવાલે માહિતી આપી હતી. આ નિરીક્ષણ દરમિયાન ખાદ્ય પદાર્થો સંબંધિત ધોરણોને પૂર્ણ ન કરતી સંસ્થાઓના લાઇસન્સ સસ્પેન્ડ કરવામાં આવશે.
