યોજનાઓ લોકો સુધી પહોંચે એ માટે CM શિંદેએ શરૂ કરી ઝુંબેશ…
મુંબઈ: વિધાનસભાની ચૂંટણીઓ બારણે છે ત્યારે સરકાર દ્વારા લાગુ કરવામાં આવેલી જનકલ્યાણ યોજનાઓ લોકો સુધી પહોંચે અને લોકોમાં તેના વિશે જાગરૂકતા ફેલાય એ માટે મુખ્ય પ્રધાન એકનાથ શિંદે દ્વારા ઝુંબેશ શરૂ કરવામાં આવી છે, જે અંતર્ગત મહાયુતિ સરકારની 10 યોજનાઓ વિશે લોકોમાં જાગરૂકતા ફેલાવવામાં આવશે.
આ પણ વાંચો : ઠાકરેને પડશે મોટો ફટકો, વિધાનસભામાં શિંદેનું શું થશે? સર્વેના ચોંકાવનારા આંકડા
‘લાડકી બહેન કુટુંબ ભેટ અભિયાન’ આ ઝુંબેશ અંતર્ગત રાજ્યના 10 કરોડ કરતાં વધુ કુટુંબ સાથે સંપર્ક સાધી તેમના સુધી યોજનાઓ પહોંચી અને યોજનાઓ વિશે તેમને માહિતી આપવાનું લક્ષ્ય છે.
ઉલ્લેખનીય છે કે હાલમાં જ ‘મુખ્ય પ્રધાન લાડકી બહેન યોજના’ને પગલે મહાયુતિમાં તું-તું-મૈં-મૈં ચાલુ હોવાનું જોવા મળ્યું હતું. અજિત પવાર જૂથ દ્વારા કરાતી આ યોજનાની જાહેરાતમાં મુખ્ય પ્રધાન એકનાથ શિંદેનો ફોટો કે નામ ન હોવાને પગલે શિવસેનાના નેતા દ્વારા વાંધો પણ ઉઠાવવામાં આવ્યો હતો.
જેને પગલે યોજનાઓ વિશે લોકો સુધી યોગ્ય માહિતી પહોંચે અને તેમનામાં જાગરૂકતા ફેલાય એ હેતુથી ‘લાડકી બહેન કુટુંબ ભેટ અભિયાન’ શરૂ કરવામાં આવ્યું હોવાનું કહેવાય છે.
સોમવારે આ યોજનાનું ઉદ્ઘાટન કરવામાં આવ્યું હતું, જે દરમિયાન શિંદેએ જણાવ્યું હતું કે અમારા પક્ષના કાર્યકર્તાઓ ‘મુખ્યમંત્રી લાડકી બહેન યોજના’, ‘મુખ્યમંત્રી યુવા પ્રશિક્ષણ યોજના’ જેવી દસ યોજનાઓ વિશે લોકોમાં જાગરૂકતા ફેલાવશે.
આ પણ વાંચો : ‘મુખ્યમંત્રી માઝી લાડકી બહિણ’ કુટુમ્બ મુલાકાત ઝુંબેશ આજથી શરૂ થશે
આ અભિયાનને પગલે મહારાષ્ટ્રના પાત્ર કુટુંબોને તેનો લાભ મળે તેની ખાતરી કરવામાં આવશે અને એ સાથે જ જો તેમને લાભ મેળવવામાં મુશ્કેલી નડી રહી હોય તો તેની નોંધ લઇ તેના ઉપાય સૂચવવામાં આવશે, એમ મુખ્ય પ્રધાને કહ્યું હતું.