DRIએ ₹ 60 કરોડના લક્ઝરી ફર્નિચર આયાત કૌભાંડનો પર્દાફાશ કર્યો: બે જણની ધરપકડ
મુંબઈઃ મુંબઈમાં ડિરેક્ટોરેટ ઓફ રેવન્યુ ઇન્ટેલિજન્સ (DRI)એ 60 કરોડ રૂપિયાના લક્ઝરી ફર્નિચરના આયાત કૌભાંડમાં કથિત સંડોવણી બદલ બે વ્યક્તિઓની ધરપકડ કરી છે. આરોપીઓ મેસર્સ ડિઝાઇન ડીકોડના માલિક રિઝવાન ઇકબાલ ચુનાવાલા (49) અને ICE ધારક સાજિદ હનીફ જાડા (44)ને કસ્ટમ્સ એક્ટ હેઠળ કસ્ટડીમાં લેવામાં આવ્યા છે. તેઓએ નોંધપાત્ર કસ્ટમ્સ ડ્યુટી ચોરી માટે આયાતી લક્ઝરી ફર્નિચરનું ઓછું મૂલ્યાંકન કર્યું હતું.
અહેવાલ મુજબ ગુપ્ત માહિતીના આધારે DRI અધિકારીઓએ મેસર્સ ડિઝાઇન ડીકોડ સામે વિગતવાર તપાસ શરૂ કરી છે. તેમના પર સપ્ટેમ્બર 2021થી વિદેશથી આયાત કરાયેલ લક્ઝરી ફર્નિચર વસ્તુઓ માટે નોંધપાત્ર રીતે ઓછા મૂલ્યો જાહેર કરવા માટે આયાત દસ્તાવેજોમાં છેડછાડ કરવાનો આરોપ છે.
આ પણ વાંચો: રાન્યા રાવ હાઈ-પ્રાફાઈલ કેસમાં બહાર આવ્યું નવું નામ, DRI એ આ એક્ટરની કરી અટકાયત…
તપાસ મુજબ કંપનીએ 392 બિલ ઓફ એન્ટ્રી દ્વારા 24 કરોડ રૂપિયાની આયાત જાહેર કરી હતી. જોકે, આ કન્સાઇન્મેન્ટનું વાસ્તવિક મૂલ્ય 60 કરોડ રૂપિયા હોવાનો અંદાજ છે. રિપોર્ટ મુજબ આ ખોટી જાહેરાતના પરિણામે કસ્ટમ્સ ડ્યુટી, ઇન્ટિગ્રેટેડ ગુડ્સ એન્ડ સર્વિસ ટેક્સ (IGST) અને સોશિયલ વેલ્ફેર સરચાર્જ (SWS)ની 20 કરોડથી વધુની ચોરી થઈ હતી.
આરોપીએ કબૂલાત કરી હતી કે ડિઝાઇન ડીકોડ એક બીજી કંપની, ડેફર્ન ફર્નિચર સ્ટુડિયો વતી માલ આયાત કરવાનું કામ કરે છે. તેમણે આ યોજનાની સંપૂર્ણ જાણકારી હોવાનું સ્વીકાર્યું અને વ્યક્તિગત નફા માટે તેને અમલમાં મૂકવામાં તેમની ભૂમિકા સ્વીકારી. જાડાએ પણ સ્વીકાર્યું કે તેમણે વિતરણ પહેલાં જ્યાં ઓછા મૂલ્યવાળા માલનો સંગ્રહ કરવામાં આવ્યો હતો તે ગોદામોની દેખરેખ કરી હતી. આ રેકેટમાં સામેલ અન્ય વ્યક્તિઓની ઓળખ માટે વધુ તપાસ ચાલી રહી છે.