ડોંબિવલીમાં હૉટલમાં સિલિન્ડર બ્લાસ્ટમાં છ જખમી

(અમારા પ્રતિનિધિ તરફથી)
મુંબઈ:ડોંબિવલીમાં ટંડન રોડ પર બુધવારે સાંજે એક હૉટલમાં એલપીજી સિલિન્ડર બ્લાસ્ટમાં વિસ્ફોટ થયો હતો, જેમાં છ લોકો જખમી થયા હતા, જેમાંથી બેની હાલત ગંભીર હોવાનું ફાયરબ્રિગેડે જણાવ્યું હતું.

ડોંબિવલીમાં ટંડન રોડ પર બુધવારે સાંજે પાંચ વાગે એક ચાઈનીઝ ફૂડની હૉટલમાં આ સિલિન્ડર સ્ફોટ થયો હતો. સ્ફોટ થવાની જાણ થતા જ ઘટના સ્થળે ફાયરબ્રિગેડ પહોંચી ગઈ હતી. અડધા કલાકમાં આગ પર નિયંત્રણ મેળવવામાં સફળતા મળી હતી. જખમીઓને તુરંત નજીકની હૉસ્પિટલમાં દાખલ કરવામાં આવ્યા હતા.

આ પણ વાંચો : ડોંબિવલી કેમિકલ બ્લાસ્ટમાં સગાઓ ગુમ હોય થયા હોય તેમને પાલિકાએ કરી આ અપીલ

ફાયરબ્રિગેડના જણાવ્યા મુજબ પ્રાથમિક તપાસમાં એલપીજી સિલિન્ડરમાં બ્લાસ્ટને કારણે આગ લાગી હોવાનું જણાયું હતું. જોકે તપાસ બાદ ચોક્કસ કારણ જાણી શકાશે. નોંધનીય છે કે ગયા અઠવાડિયા જ ડોંબિવલીમાં એમઆઈડીસી એરિયામાં આવેલી કેમિકલ ફેકટરીમાં બ્લાસ્ટ થયો હતો, જેમાં ૧૪થી વધુના મૃત્યુ થયા હતા.