‘ડિજિટલ અરેસ્ટ’ને નામે વૃદ્ધા પાસેથી ત્રણ કરોડ રૂપિયા પડાવવા પ્રકરણે ત્રણ વેપારીની ધરપકડ…
થાણે: ‘ડિજિટલ અરેસ્ટ’માં રાખીને થાણેની વૃદ્ધા પાસેથી ત્રણ કરોડથી વધુ રૂપિયા પડાવવાના કેસમાં પોલીસે ઈન્ટરનૅશનલ ફ્રોડ સિન્ડિકેટ સાથે કથિત રીતે સંકળાયેલા ત્રણ વેપારીની ધરપકડ કરી હતી. પકડાયેલા આરોપીઓની ઓળખ કિશોર બંસીલાલ જૈન (63), મહેશ પવન કોઠારી (36) અને ધવલ સંતોષ ભાલેરાવ (26) તરીકે થઈ હતી. આરોપી જૈન એક કો-ઑપરેટિવ ક્રેડિટ સોસાયટીનો ચૅરમૅન છે તો કોઠારી ગાર્મેન્ટ અને ઈમિટેશન જ્વેલરીના વ્યવસાય સાથે સંકળાયેલો છે, જ્યારે ભાલેરાવ કૉસ્મેટિક્સના વ્યવસાયમાં હોવાનું જાણવા મળ્યું હતું.
પોલીસ ફરિયાદ અનુસાર આરોપીએ કુરિયર કંપનીના કર્મચારીના સ્વાંગમાં થાણેની 61 વર્ષની ફરિયાદીને 13 ઑગસ્ટ, 2024ના રોજ કૉલ કર્યો હતો. ફરિયાદીના નામના પાર્સલમાંથી લૅપટોપ, 140 ગ્રામ એમડી ડ્રગ્સ, થાઈ પાસપોર્ટ, ત્રણ ક્રેડિટ કાર્ડ અને ચાર કિલો વજનનાં કપડાં જપ્ત કરવામાં આવ્યાં હોવાનું શખસે કહ્યું હતું. બાદમાં સીબીઆઈ અધિકારીને નામે બીજા નંબર પરથી ફરિયાદીને કૉલ આવ્યો હતો. બનાવટી દસ્તાવેજો બતાવીને આરોપીએ ડિજિટલ અરેસ્ટને નામે ફરિયાદી પાસેથી નાણાં પડાવ્યાં હતાં. ડરી ગયેલી ફરિયાદીએ આરોપીની સૂચનાને અનુસરી બે અલગ અલગ બૅન્કનાં બે ખાતાંમાં 3.04 કરોડ રૂપિયા ટ્રાન્સફર કર્યા હતા, એમ ડેપ્યુટી પોલીસ કમિશનર પરાગ મણેરેએ જણાવ્યું હતું.
આ પ્રકરણે ગયા વર્ષની 13 સપ્ટેમ્બરે ભારતીય ન્યાય સંહિતાની કલમ 318(4), 316(5), 336(3) અને 340(2) તેમ જ ઈન્ફર્મેશન ટેક્નોલૉજી ઍક્ટ હેઠળ એફઆઈઆર નોંધવામાં આવ્યો હતો. થાણે સાયબર પોલીસે આ કેસની તપાસ હાથ ધરી ઈન્ટરનૅશનલ સિન્ડિકેટની કડીનો પર્દાફાશ કર્યો હતો. આરોપીઓએ ઠગાઈથી મેળવેલી રકમમાંથી 82.46 લાખ રૂપિયા યુએસ ડૉલર્સમાં ક્ધવર્ટ કરી વિદેશમાં ટ્રાન્સફર કર્યા હોવાનું તપાસમાં જણાયું હતું. (પીટીઆઈ)
