અજિત પવારના નિધન બાદ મહારાષ્ટ્રમાં બજેટનું ‘સંકટ’: કોણ બનશે નવા નાણા પ્રધાન?
મુંબઈઃ અજિત પવારના નિધનથી મહારાષ્ટ્ર સરકાર સંકટમાં આવી ગઈ છે. મહત્વપૂર્ણ નાણાં મંત્રાલય સંભાળતા નાયબ મુખ્ય પ્રધાન અજિત પવારના અવસાનથી સરકાર સમક્ષ બજેટ સત્ર પહેલા બજેટ રજૂ કરવાની સાથે નાણાં પ્રધાન કોને બનાવવા એના માટે ખૂદ મુખ્ય પ્રધાન દેવેન્દ્ર ફડણવીસની ટીમ હરકતમાં આવી ગઇ છે.
ટૂંકા ગાળામાં નાણાં વિભાગને સંભાળવું એ એક જટિલ કાર્ય માનવામાં આવે છે, ખાસ કરીને બજેટ પ્રક્રિયા પહેલાથી જ ચાલી રહી છે. વરિષ્ઠ અધિકારીઓ અને રાજકીય નિરીક્ષકો કહે છે કે મુખ્ય પ્રધાન દેવેન્દ્ર ફડણવીસ કામચલાઉ ધોરણે નાણાં વિભાગનો હવાલો સંભાળી શકે છે, અને રાજ્યનું બજેટ પણ પોતે રજૂ કરી શકે છે.
મહારાષ્ટ્ર બજેટ સત્ર 23 ફેબ્રુઆરીથી શરૂ થશે. મહારાષ્ટ્ર આર્થિક રીતે દેશમાં અગ્રણી રાજ્ય છે. તેથી, મહારાષ્ટ્ર બજેટ રજૂ કરવું એ સૌથી મહત્વપૂર્ણ બાબત છે. ગયા વર્ષે, અજિત પવારે મહાયુતિ સરકારનું બજેટ રજૂ કર્યું હતું, જે તેમનું અગિયારમું બજેટ હતું, જે મહારાષ્ટ્રના ઇતિહાસમાં કોઈ પણ નાણા પ્રધાન દ્વારા રજૂ કરાયેલું બીજા નંબરે સૌથી વધુ વખત હતું.
નાણાકીય દબાણ હોવા છતાં પવારે જાહેરાત કરી હતી કે સરકાર રેડી રેકનર રેટમાં વધારો કરશે નહીં કે કોઈ મોટો નવો કર લાગુ કરશે નહીં, કારણ કે તેમણે કરદાતાઓ અને સામાન્ય માણસ પર બોજ વધારશે તેવી ચિંતા વ્યક્ત કરી હતી.
તેમણે એ પણ ખાતરી આપી હતી કે વિકાસ અથવા માળખાગત ખર્ચમાં કોઈ ઘટાડો કરવામાં આવશે નહીં. જોકે, અનેક નવા માળખાગત પ્રોજેક્ટ્સ લાઇનમાં હોવાથી અને મહેસૂલ આવક પર દબાણ હોવાથી, અધિકારીઓ સ્વીકારે છે કે આગામી બજેટને સંતુલિત કરવું મુશ્કેલ બનશે.
સંજોગોને જોતાં મંત્રાલયમાં ઘણા લોકો માને છે કે મુખ્યમંત્રી દેવેન્દ્ર ફડણવીસ નાણા વિભાગનો કામચલાઉ હવાલો સંભાળવા માટે સૌથી યોગ્ય વિકલ્પ છે. ફડણવીસે અગાઉ આ પોર્ટફોલિયો સંભાળ્યો છે અને બજેટ બનાવવાની પ્રક્રિયાથી પરિચિત છે.
ભૂતકાળમાં, તેમણે રાજ્યના બજેટને સરળ ભાષામાં સમજાવતી એક સરળ પુસ્તિકા પણ લખી હતી, જેનો હેતુ નાગરિકોને જટિલ નાણાકીય શરતો અને ફાળવણીઓને સમજવામાં મદદ કરવાનો હતો. રાજકીય અનિશ્ચિતતા અને નાણાકીય દબાણ વચ્ચે સરકાર બજેટ સત્રની તૈયારી કરી રહી છે, ત્યારે મહારાષ્ટ્રના નાણાકીય સંચાલનની જવાબદારી હવે આગામી નેતૃત્વ પર છે.
