થાણે: મીરા રોડમાં પત્નીને આત્મહત્યા માટે કથિત રીતે ઉશ્કેરવાના કેસમાં બુલઢાણાના વતની એવા પોલીસ કોન્સ્ટેબલ પતિ અને સાસરિયાંની ધરપકડ કરવામાં આવી હતી.
પોલીસના જણાવ્યા મુજબ દંપતીના મીરા રોડ સ્થિત નિવાસસ્થાને ગુરુવારે સ્વાતિ ચાટે (19)એ ગળાફાંસો ખાઈ જીવન ટૂંકાવ્યું હતું. આ કેસમાં સ્વાતિના પતિ સહિત ચાર જણની ધરપકડ કરવામાં આવી હતી. ઘટના પ્રકરણે વધુ તપાસ કરવામાં આવી રહી છે, એવું મીરા રોડ પોલીસ સ્ટેશનના સિનિયર ઈન્સ્પેક્ટરે જણાવ્યું હતું.
ધરપકડ કરાયેલા આરોપીઓમાં પતિ પ્રભુ ચાટે, તેના પિતા ભગવાન ચાટે (63), માતા રંજના (55) અને બહેન પુષ્પા સાનપ (30)નો સમાવેશ થાય છે. આરોપીઓ વિરુદ્ધ આત્મહત્યા માટે પ્રવૃત્ત કરવા સહિતની ભારતીય ન્યાય સંહિતાની સુસંગત કલમો હેઠળ એફઆઈઆર નોંધવામાં આવ્યો હતો.
તેની માતાએ નોંધાવેલી ફરિયાદ અનુસાર સ્વાતિને તેના પતિ અને સાસરિયાં દ્વારા સતત શારીરિક અને માનસિક ત્રાસ આપવામાં આવતો હતો. પતિ પ્રભુ ચાટે સ્વાતિના ચારિત્ર્ય પર અને તેના ગર્ભમાં રહેલા બાળકના પિતા વિેશે પણ શંકા કરતો હતો.
ફરિયાદ અનુસાર સ્વાતિના આ વર્ષના એપ્રિલ મહિનામાં જ પ્રભુ સાથે લગ્ન થયાં હતાં. લગ્ન બાદથી પતિ અને સાસરિયાં સ્વાતિને ત્રાસ આપવા લાગ્યા હતા. પતિ દારૂ ઢીંચીને આવતો અને સ્વાતિની મારઝૂડ કરતો હતો.
પોલીસે જણાવ્યું હતું કે બીજી નવેમ્બરે દંપતી મીરા રોડમાં રહેવા આવ્યું ત્યારથી પતિ સ્વાતિની મારપીટ કરતો હતો. તે વારંવાર ગર્ભમાંના બાળકના પિતા કોણ છે તેની મેડિકલ ટેસ્ટ કરવાનું સ્વાતિને કહેતો. પતિના ત્રાસથી કંટાળેલી સ્વાતિએ 27 નવેમ્બરે માતાને ફોન કર્યો હતો. પતિનો ત્રાસ હવે સહન નથી થતો કહીને તેણે આત્મહત્યા કરી હતી.
(પીટીઆઈ)
આ પણ વાંચો…સાત વર્ષથી નાસતો ફરતો છેતરપિંડી કેસનો આરોપી, ક્રાઈમ બ્રાન્ચે આ રીતે કરી ધરપકડ
