મુંબઈ મેટ્રો થ્રીમાં મોબાઇલ નેટવર્ક બ્લેકઆઉટને કારણે પ્રવાસીઓને પડે છે આ મુશ્કેલી

મુંબઈઃ મુંબઈની પ્રથમ ભૂગર્ભ મેટ્રો એક્વા લાઇન 3 પર ગઈકાલે મેટ્રો સ્ટેશન અને ટ્રેનોમાં મોબાઇલ ફોનનું નેટવર્ક ઑફલાઇન થઈ જતા મુસાફરોને મુશ્કેલીનો સામનો કરવો પડ્યો હતો. આ આઉટેજને કારણે મુસાફરો મોબાઇલ ટિકિટિંગ, કોલ કરવો અથવા ડિજિટલ વ્યવહારો કરી શકતા નહોતા, જેના કારણે પીક અવર્સ દરમિયાન મુસાફરોને મુશ્કેલી પડતી હોવાનું જણાવ્યું હતું.

મોબાઈલનું અચાનક નેટવર્ક ઑફલાઇન થવાને કારણે મુસાફરો ટિકિટ વેન્ડિંગ મશીનોમાંથી ઈ-ટિકિટ મેળવી શકતા નહોતા કે UPI-આધારિત ચુકવણી એપ્લિકેશનોનો ઉપયોગ કરી શકતા નહોતા. સ્ટેશનો પર નોટિસ લગાવીને મુસાફરોને નેટવર્કમાં પ્રવેશતા પહેલા મેટ્રો એપ્લિકેશનમાંથી ઓફલાઇન ટિકિટ સક્રિય કરવાની સલાહ આપવામાં આવી હતી.

આ પણ વાંચો: મુંબઈની પહેલી અંડરગ્રાઉન્ડ મેટ્રો થ્રી માટે હવે આવી ગઈ નવી અપડેટ

આ ઘટનાથી મુંબઈ મેટ્રો રેલ કોર્પોરેશન લિમિટેડ (MMRCL) અને ટેલિકોમ ઓપરેટરો વચ્ચે ભૂગર્ભ સિસ્ટમની અંદર સેલ્યુલર ઇન્ફ્રાસ્ટ્રક્ચરની સ્થાપના અંગે ચાલી રહેલા મડાગાંઠ સામે આવી છે.

જોકે MMRCL એ નેટવર્ક બંધ થવા અંગે સત્તાવાર રીતે કોઈ ટિપ્પણી કરી નથી, પરંતુ તેણે અગાઉ આ બાબતે પોતાનું વલણ સ્પષ્ટ કર્યું હતું. અગાઉના નિવેદન મુજબ MMRCLએ લાઇન 3 માટે તટસ્થ ટેલિકોમ ઇન્ફ્રાસ્ટ્રક્ચર પ્રદાતાની નિમણૂક કરવા માટે પારદર્શક બિડિંગ પ્રક્રિયાનું પાલન કર્યું છે.

આ પણ વાંચો: મેટ્રો-થ્રીના પ્રવાસીઓની સંખ્યા ૧૧ લાખ સુધી પહોંચાડવાનું લક્ષ્ય…

આ કંપની પાસે જરૂરી લાઇસન્સ છે અને તેણે પહેલાથી જ ઇન્ફ્રાસ્ટ્રક્ચર નિર્માણ કર્યું છે. ખુલ્લા ટેન્ડર દ્વારા પસંદગી કરવામાં આવી હતી, જેને ટેલિકોમ કંપનીઓએ પત્રો દ્વારા સમર્થન આપ્યું હતું. અનિયમિતતાનો આરોપ પાયાવિહોણો છે, એમ કોર્પોરેશને જણાવ્યું હતું.

બાંદ્રા-કુર્લા કોમ્પ્લેક્સ (BKC)થી વર્લીના આચાર્ય અત્રે ચોક સુધીના નવા કાર્યરત કોરિડોર પર છ ભૂગર્ભ સ્ટેશનો છે અને દર 6 મિનિટ અને 20 સેકન્ડે ટ્રેનો દોડે છે. આઠ ટ્રેનો દરરોજ 244 ટ્રીપ કરે છે, જેનું ભાડું 10 રૂપિયાથી 40 રૂપિયા સુધી છે. આરે JVLR થી વર્લી સુધીની સંપૂર્ણ મુસાફરી માટે મહત્તમ ભાડું 60 રૂપિયા છે.