મુંબઈ: ગૅન્ગસ્ટર રોહિત ગોદરા અને ગૉલ્ડી બ્રારના નામે કૉમેડિયન કપિલ શર્માને ધમકી આપી એક કરોડ રૂપિયાની ખંડણી માગવાના કેસમાં ક્રાઈમ બ્રાન્ચે પશ્ચિમ બંગાળના રહેવાસીની ધરપકડ કરી હતી.
પકડાયેલા આરોપીની ઓળખ દિલીપ ચૌધરી તરીકે થઈ હતી. કોર્ટે તેને 30 સપ્ટેમ્બર સુધીની પોલીસ કસ્ટડી ફટકારી હતી.
પોલીસ ફરિયાદ અનુસાર આરોપીએ કપિલ શર્માના પર્સનલ આસિસ્ટન્ટને 22 અને 23 સપ્ટેમ્બરે કૉલ કર્યા હતા. લૉરેન્સ બિશ્ર્નોઈ ગૅન્ગ તેમ જ ગૅન્ગસ્ટર્સ ગોદરા અને બ્રારના નામે ધમકાવીને આરોપીએ એક કરોડ રૂપિયાની માગણી કરી હતી.
આરોપીએ શર્માના આસિસ્ટન્ટને વીડિયો મેસેજીસ પણ મોકલ્યા હતા. આ મેસેજમાં પણ જાનથી મારવાની ધમકી આપી હતી, એવું સૂત્રોએ જણાવ્યું હતું.
આ પણ વાંચો: ખબરદાર મુંબઈને બોમ્બે કહ્યું છે તો…કપિલ શર્માને આ ધમકી કોણે આપી?
આ પ્રકરણે ક્રાઈમ બ્રાન્ચે તપાસ હાથ ધરી ફરિયાદીને આવેલા કૉલ્સની વિગતો પ્રાપ્ત કરી હતી. ટેક્નિકલ બાબતોનો અભ્યાસ કરી આરોપીને ટ્રેસ કરવામાં આવ્યો હતો. પોલીસની ટીમે પશ્ચિમ બંગાળ પહોંચી આરોપીને તાબામાં લીધો હતો. મુંબઈ લાવવામાં આવેલા આરોપીને કોર્ટ સમક્ષ હાજર કરવામાં આવ્યો હતો.
ઉલ્લેખનીય છે કે કેનેડામાં આવેલી કપિલના કૅફે પર 10 જુલાઈએ ગોળીબાર કરવામાં આવ્યો હતો. અંધાધૂંધ ગોળીબાર કરી હુમલાખોરો ફરાર થઈ ગયા હતા. બાદમાં સાતમી ઑગસ્ટે પણ કપિલના કૅફે પર ગોળીબાર થયો હતો, જેમાં હુમલાખોરે છ રાઉન્ડ ફાયર કર્યા હતા.
