7-સ્ટાર હોટેલ નહીં, ન્યાયનું મંદિર બનાવો: CJI ગવઈએ મુંબઈના આર્કિટેક્ટ્સને કડક સલાહ આપી
મુંબઈઃ સુપ્રીમ કોર્ટના મુખ્ય ન્યાયાધીશ બી.આર. ગવઈએ મુંબઈની મુલાકાત દરમિયાન બોમ્બે હાઈ કોર્ટના નવા મકાન અને લો યુનિવર્સિટીનો શિલાન્યાસ કર્યો. આ પ્રસંગે ગવઈએ આર્કિટેક્ટને સલાહ આપી. તેમણે નવી બોમ્બે હાઈકોર્ટની ઇમારતને સ્ટાર હોટલ નહીં પણ ન્યાયનું મંદિર બનાવવાની હાકલ કરી.
સીજેઆઈ ગવઈએ કહ્યું, “મેં મીડિયામાં વાંચ્યું છે કે નવી ઇમારતમાં એક લિફ્ટ ફક્ત બે જજ શેર કરશે. હું સ્પષ્ટ કરવા માંગુ છું કે ન્યાયાધીશો હવે સામંતશાહી શાસકો નથી. ટ્રાયલ કોર્ટ હોય કે સુપ્રીમ કોર્ટના ન્યાયાધીશો, આપણે બધા અહીં જનતાની સેવા કરવા માટે છીએ, તેથી આ ઇમારત ભવ્ય ભલે હોય, પણ ન્યાયની દિવ્યતા જળવાઈ રહેવી જોઈએ.
આ પણ વાંચો: ‘તમારા અસીલો ઝડપથી નારાજ થઈ જાય છે’; સુનાવણી દરમિયાન CJI ગવઈએ આવું કેમ કહ્યું?
નવી બોમ્બે હાઈ કોર્ટ ઈમારતનો મૂળ ખર્ચ, અંદાજે આશરે ₹3,750 કરોડ હતો, તે હવે વધીને ₹4,217 કરોડ થઈ ગયો છે. મહારાષ્ટ્ર સરકારે બાંધકામ માટે 30 એકર જમીન ફાળવી છે, જેમાંથી 15 એકર જમીન સોંપી દેવામાં આવી છે. બાકીની 15 એકર જમીન માર્ચ 2026 સુધીમાં આપવામાં આવશે. બુધવારે સુપ્રીમ કોર્ટના મુખ્ય ન્યાયાધીશ ભૂષણ ગવઈ દ્વારા મહારાષ્ટ્રના મુખ્ય પ્રધાન દેવેન્દ્ર ફડણવીસની હાજરીમાં બોમ્બે હાઈ કોર્ટના નવા મકાનનો શિલાન્યાસ કરવામાં આવ્યો હતો. આ પ્રસંગે બોમ્બે હાઈ કોર્ટના મુખ્ય ન્યાયાધીશ ચંદ્રશેખર, નાયબ મુખ્યપ્રધાન એકનાથ શિંદે, નાયબ મુખ્ય પ્રધાન અજિત પવાર, પ્રધાન શિવેન્દ્રસિંહ રાજે ભોસલે હાજર રહ્યા હતા.
આ પણ વાંચો: જૂતું ફેંકવાની ઘટના મુદ્દે જસ્ટિસ ગવઈએ પહેલી વાર આપી પ્રતિક્રિયા, જાણો શું કહ્યું?
બોમ્બે હાઈ કોર્ટની આ નવી ઇમારત આર્કિટેક્ટ હાફિઝ કોન્ટ્રાક્ટર દ્વારા ડિઝાઇન કરવામાં આવી છે. હાફિઝ કોન્ટ્રાક્ટર દેશના એક પ્રખ્યાત આર્કિટેક્ટ છે. એ નોંધનીય છે કે નવી બોમ્બે હાઈ કોર્ટ ઈમારતની સોશિયલ મીડિયા અને મીડિયામાં વ્યાપકપણે ચર્ચા તેની ભવ્યતા માટે થઈ છે. હવે, સીજેઆઈ ગવઈએ કડક ચેતવણી આપી છે.
બોમ્બે હાઈ કોર્ટનું નવું સંકુલ વેસ્ટર્ન એક્સપ્રેસવે પર સ્થિત બાંદ્રા સરકારી કોલોની વિસ્તારમાં બનાવવામાં આવી રહ્યું છે. નવી બોમ્બે હાઈ કોર્ટની ઇમારતનો વિસ્તાર છ ઓવલ મેદાન જેટલો હોવાનો અંદાજ છે જેમાં 75 કોર્ટરૂમ હશે.
