આજે પુત્ર માતા-પિતાને તીર્થયાત્રા પર લઈ જવાને બદલે કોર્ટમાં લઈ જઈ રહ્યો છે એમ પણ કહ્યું…
મુંબઈ: બોમ્બે હાઈ કોર્ટે તાજેતરની સમાજ વ્યવસ્થા પર ભારે અફસોસ વ્યક્ત કરતાં જણાવ્યું હતું કે આજના યુગમાં ઉછેરમાં કશું ખોટું થઈ રહ્યું છે જ્યાં એક પુત્ર શ્રવણકુમારની જેમ વૃદ્ધ માતા-પિતાને તીર્થયાત્રાએ લઈ જવાને બદલે કોર્ટમાં ઘસડી જાય છે. માતાપિતાને ઘરમાં પ્રવેશ પર પ્રતિબંધ ફરમાવવાનો આદેશ માગનાર વ્યક્તિને રાહત આપવાનો ઇનકાર કર્યો.
જસ્ટિસ જીતેન્દ્ર જૈનની ખંડપીઠે ગુરુવારે પસાર કરેલા એક આદેશમાં, તે વ્યક્તિને કોઈ રાહત આપવાનો ઇનકાર કર્યો હતો જેણે તેના માતાપિતાને તેમની તબીબી સારવાર માટે મુંબઈની મુલાકાત લેતી વખતે ઉપનગર ગોરેગાંવમાં આવેલા તેના ઘરનો ઉપયોગ કરવાથી રોકવાનો આદેશ માગ્યો હતો.
જાન્યુઆરી 2018માં મુંબઈની એક સિવિલ કોર્ટે તેના માતાપિતાને ઘરનો ઉપયોગ કરવાથી રોકવાનો આદેશ આપવાનો ઇનકાર કરી દેતાં આ વ્યક્તિએ મુંબઈ હાઈ કોર્ટમાં સિવિલ કોર્ટના ચુકાદાને પડકાર્યો હતો.
આ પણ વાંચો : ધારાવી પુનર્વિકાસ: મીઠાના અગરની જમીન ટ્રાન્સફર વિરુદ્ધ PIL બોમ્બે હાઈ કોર્ટે ફગાવી…
હાઈ કોર્ટે આદેશમાં અવલોકન કર્યું હતું કે આ એક વધુ ઉદાહરણ છે અને ‘દુર્ભાગ્યપૂર્ણ સ્થિતિ’ છે જ્યાં એક પુત્રએ તેના બીમાર અને વૃદ્ધ માતાપિતાની સંભાળ રાખવાની નૈતિક ફરજ બજાવવાને બદલે, પ્રતિબંધના આદેશની માગણી કરતો દાવો દાખલ કરી રહ્યો છે.
ન્યાયાધીશ જૈને કહ્યું કે આપણી સંસ્કૃતિમાં કેળવાયેલા નૈતિક મૂલ્યોનું એટલી હદે પતન થઈ ગયું છે કે ‘આપણે શ્રવણ કુમારને ભૂલી ગયા છીએ જેઓ પોતાના માતાપિતાને તીર્થયાત્રા પર લઈ ગયા હતા અને રસ્તામાં પોતાનું જીવન આપી દીધું હતું.’
ઉલ્લેખનીય છે કે, શ્રવણ કુમાર હિન્દુ મહાકાવ્ય રામાયણનું એક પાત્ર છે, જે તેમના પિતા પ્રત્યેના ભક્તિ માટે જાણીતા હતા. ‘આજના યુગમાં, આપણા બાળકોના ઉછેરમાં કંઈક ખૂબ જ ગંભીર ખામી છે કે એક બાળક માતા-પિતાને તીર્થયાત્રાને બદલે કોર્ટમાં લઈ જઈ રહ્યું છે,’ એમ હાઈ કોર્ટે જણાવ્યું હતું.
આ પણ વાંચો : ટિકિટોના કાળાબજારને રોકવા માર્ગદર્શિકા માંગતી પીઆઈએલને બોમ્બે હાઈ કોર્ટે ફગાવી…
ન્યાયાધીશ જૈને માતાપિતા-બાળકના સંબંધો પર અનેક કહેવતો સૂચિબદ્ધ કરી અને કહ્યું હતું કે માતા-પિતાની સંભાળ રાખવી એ પુત્રની એક પવિત્ર અને નૈતિક ફરજ છે. આ કેસનો ઉલ્લેખ કરતા ન્યાયાધીશ જૈને કહ્યું હતું કે તેમનો મત છે કે અરજદારે તેના વૃદ્ધ માતા-પિતાની સંભાળ રાખવી પડશે.
કોર્ટે એ બાબતની પણ નોંધ લીધી હતી કે હાલમાં, માતાપિતા દક્ષિણ-પશ્ર્ચિમ મહારાષ્ટ્રના કોલ્હાપુરમાં તેમના ત્રીજા પુત્ર સાથે રહે છે, પરંતુ તેમને રાજ્ય સંચાલિત જે. જે. હોસ્પિટલમાં તબીબી સારવાર માટે લગભગ 380 કિમી દૂર મુંબઈ જવું પડે છે.
આ પણ વાંચો : મુંબઈમાં વધી રહ્યું છે વાયુ પ્રદૂષણ, બોમ્બે હાઈ કોર્ટે તંત્રને ફટકાર લગાવી
બેન્ચે અરજદાર પુત્ર અથવા તેની પત્નીને નિર્દેશ આપ્યો કે જ્યારે પણ તેઓ મુંબઈ આવશે ત્યારે માતાપિતાને લેવા જશે, તેમને તેમના નિવાસસ્થાને તેડી લાવશે અને સારવાર માટે તેમની સાથે હોસ્પિટલમાં પણ જશે.
જો આદેશનો કોઈ ભંગ થશે અથવા માતાપિતાને કોઈ અસુવિધા થશે તો અરજદાર પુત્રને આ આદેશનો તિરસ્કાર કરવામાં આવશે અને તેની સામે યોગ્ય કાર્યવાહી કરવામાં આવશે, એવી ચેતવણી કોર્ટે આપી હતી.
(પીટીઆઈ)
