ભાજપ લઘુમતી મોરચાએ મુંબઈમાં દુકાનોને પાકિસ્તાની ઉત્પાદનો વેચવાનું બંધ કરવા ચેતવણી આપી, તોડફોડની ધમકી આપી

(અમારા પ્રતિનિધિ તરફથી)

મુંબઇ: ભાજપ લઘુમતી મોરચાના મુંબઈ એકમે પહલગામ હુમલાને પગલે માહિમમાં દુકાનોને પાકિસ્તાની ઉત્પાદનોનો બહિષ્કાર કરવાની તેમ જ આવા ઉત્પાદનો રાખવાનું બંધ કરવાની ચેતવણી આપી છે. સત્તાધારી ભાજપની માઈનોરિટી શાખાએ માહિમ વિસ્તારમાં વિરોધ મોર્ચો પણ કાઢ્યો હતો.

પાર્ટીએ એવી દુકાનોને પત્રો મોકલ્યા છે જે પાકિસ્તાની ઉત્પાદનો વેચતી હતી, જેમાં મોટાભાગના મસાલાનો સમાવેશ થાય છે. પત્રમાં કહેવામાં આવ્યું છે: અમારા ધ્યાનમાં આવ્યું છે કે માહિમમાં કેટલીક દુકાનો પાકિસ્તાની મસાલા અને અન્ય રસોઈની સામગ્રી વેચી રહી છે. અમે અહીં કડક ચેતવણી આપીએ છીએ કે તાત્કાલિક તમામ પાકિસ્તાની ઉત્પાદનોનું વેચાણ બંધ કરો.

પત્રમાં ઉમેર્યું હતું કે પાકિસ્તાની માલ વેચતી દુકાનોને ‘ગંભીર પરિણામોનો સામનો કરવો પડશે અને તેમના કાર્યો માટે સંપૂર્ણપણે જવાબદાર ઠેરવવામાં આવશે’.

‘જો આમ ન થાય તો, અમે, જવાબદાર નાગરિકો તરીકે, કાર્યવાહી કરવા માટે મજબૂર થઈશું,’ એમ પત્રમાં જણાવાયું છે. પત્રની એક નકલ માહિમ પોલીસ સ્ટેશનને પણ મોકલવામાં આવી છે.

મ્યુનિસિપલ વોર્ડ 190ના ભૂતપૂર્વ કોર્પોરેટર શીતલ ગંભીરના નેતૃત્વ હેઠળ દુકાનો અને ગોદામોની મુલાકાત લેનારું જૂથ માહિમમાં ફરી રહ્યું હતું. ભાજપ લઘુમતી મોરચાના મુંબઈ એકમના મહાસચિવ અગ્નેલો ફર્નાન્ડિઝે જણાવ્યું હતું કે, અમે દુકાનોને ઉત્પાદનોનો નાશ કરવા અથવા ફેંકી દેવા માટે સમયમર્યાદા આપી છે. જો તેઓ આમ નહીં કરે, તો અમે દુકાનોમાં તોડફોડ કરીશું, એમ ફર્નાન્ડિઝે જણાવ્યું હતું.

માહિમના રહેવાસીઓએ જણાવ્યું હતું કે કેટલીક દુકાનોમાં વેચાતી પાકિસ્તાની વસ્તુઓ જેમ કે મસાલા અને સલવાર કમીઝના સેટ છે. જોકે, આ ઉત્પાદનો સીધા પાકિસ્તાનથી આયાત કરવામાં આવતા નથી. માલ દુબઈ થઈને આવે છે, માહિમના રહેવાસી ફારૂક ધાલાએ જણાવ્યું હતું.

ગયા અઠવાડિયે શિવાજી પાર્ક પોલીસ સ્ટેશને દાદર બજાર વિસ્તારમાં મુસ્લિમ ફેરિયાઓ સાથે દુર્વ્યવહાર અને હુમલો કરવા બદલ માહિમ વિધાનસભા મતવિસ્તાર એકમના પ્રમુખ અક્ષતા તેંડુલકર સહિત નવ ભાજપ કાર્યકરો સામે કેસ નોંધ્યો હતો. આ ફરિયાદ એક ફેરિયા દ્વારા દાખલ કરવામાં આવી હતી, જેમાં આરોપ મૂકવામાં આવ્યો હતો કે તેંડુલકર અને તેના જૂથે સહાયકોને તેમના ધર્મ વિશે પૂછ્યું હતું. તેંડુલકરે કહ્યું છે કે બજારમાં ફેરિયાઓમાં ગેરકાયદેસર બાંગ્લાદેશી ઇમિગ્રન્ટ્સ પણ હતા તેવી ફરિયાદો બાદ તેંડુલકરે બજારની મુલાકાત લીધી હતી.