કેમ્પાકોલા બિલ્ડિંગની યાદ અપાવતો ચૂકાદોઃ તાડદેવની હાઈરાઈઝના 17 માળ ખાલી કરવાનો આદેશ

મુંબઈઃ વર્ષ 2005માં દક્ષિણ મુંબઈની પૉશ ઈમારત કેમ્પા કોલા કમમ્પાઉન્ડનો કાનૂની જંગ છાપે ચડયો હતો ત્યારે હવે દક્ષિણ મુંબઈના પૉશ એરિયા તાડદેવની એક 34 માળીય ઈમારત મામલે કોર્ટે આપેલો હુકમ ચર્ચામાં આવ્યો છે. તાડદેવ વિસ્તારમાં આવેલ 34 માળના વેલિંગડન હાઈટ્સને બોમ્બે હાઈકોર્ટે મોટો આદેશ આપ્યો છે. કોર્ટે આ ગેરકાયદે બાંધકામને “કાયદાનો દુરુપયોગ” ગણાવી, ઓક્યુપેશન સર્ટિફિકેટ (OC) અને ફાયર NOC વિનાના અમુક માળો પર રહેવાની મનાઈ ફરમાવી છે. બોમ્બે હાઈકોર્ટે વેલિંગડન હાઈટ્સના 17થી 34મા માળના રહેવાસીઓને બે અઠવાડિયામાં ફ્લેટ ખાલી કરવાનો આદેશ આપ્યો છે. ઉલ્લેખનીય છે કે, આ નિર્ણય 15 જુલાઈએ જાહેર થયો હતો પરંતુ વિગતવાર આદેશ શનિવારે મોડી રાત્રે પ્રકાશિત કરવામાં આવ્યો હતો.

વેલિંગડન હાઈટ્સ, જે એમ&એસ સેટેલાઈટ હોલ્ડિંગ્સ દ્વારા બાંધવામાં આવ્યું છે. આ બિલ્ડિંગના 16 માળને જ તંત્ર દ્વારા OC આપવામાં આવ્યું હતું. પરંતુ બિલ્ડરે 34 માળનું બાંધકામ બનાવ્યું હતું. 17થી 34મા માળ 2011થી ગેરકાયદે રીતે વસવાટમાં છે, જેની સામે બૃહન્મુંબઈ મહાનગરપાલિકા (BMC)એ વારંવાર નોટિસો જારી કરી હતી. આ બિલ્ડિંગ મામલે હાઈકોર્ટમાં કેસ ચાલી રહ્યો હતો. જેના પર કોર્ટે આ ગેરકાયદે વસવાટને “અતિ ખતરનાક” ગણાવી, કોઈ રાહત આપવાનો ઇનકાર કર્યો.

સોસાયટીના સભ્ય સુનીલ બી. ઝવેરી (HUF) અને અન્ય ફ્લેટ ખરીદનારાઓએ કોર્ટમાં રાહત અને બાંધકામ નિયમિત કરવા માટે સમય માગ્યો હતો. વરિષ્ઠ વકીલે કોર્ટ પાસે એક વર્ષનો સમય માગ્યો, પરંતુ કોર્ટે આ અરજીને “અતિ બેશરમ” ગણાવી ફગાવી હતી. કોર્ટે જણાવ્યું કે આવું કરવું “કાયદાવિહોણું” હશે અને આ ગેરકાયદે વસવાટને મંજૂરી આપી શકાય નહીં.

BMCના વરિષ્ઠ વકીલે જણાવ્યું કે 2011થી આઠ નોટિસો જારી થઈ હોવા છતાં, ઉપરના માળો પર વસવાટ ચાલુ છે. બાંધકામ દરમિયાન ‘કન્સ્ટ્રક્શન ફાયર NOC’ મળ્યું હતું, પરંતુ અંતિમ ફાયર NOC ક્યારેય મળ્યું નથી. કોર્ટે નોંધ્યું કે આખી ઇમારત ફાયર સેફ્ટી વિના જોખમી છે અને તેને સીલ કરવી જોઈએ.

1થી 16મા માળ, જેને આંશિક OC મળ્યું છે, તેના પર 29 જુલાઈએ વધુ સુનાવણી થશે. આ માળો પર પણ ફાયર NOCનો અભાવ છે. કોર્ટે BMCને આ માળોના તોડકામ પર હાલ રોક લગાવી છે. કોર્ટે રહેવાસીઓને “સ્વાર્થી” ગણાવી, જણાવ્યું કે આ ઉચ્ચ વર્ગના લોકોએ જાણીજોઈને કાયદાનું ઉલ્લંઘન કર્યું છે.