મુંબઈઃ મુંબઈના લોકમાન્ય તિલક ટર્મિનસ (એલટીટી) પર એક RPF કોન્સ્ટેબલે પ્રવાસીનો જીવ બચાવ્યો હતો. આ ઘટનાના વાયરલ થયેલા વીડિયોમાં જોઈ શકાય છે કે એક વ્યક્તિ કોચુવેલી ગરીબ રથ એક્સપ્રેસને પકડવાનો પ્રયાસ કરી રહ્યો હતો ત્યારે તે કોચ અને પ્લેટફોર્મ વચ્ચે ફસાઈ ગયો હતો, પરંતુ પળવારમાં કોન્સ્ટેબલે પ્રવાસીને પ્લેટફોર્મ અને ટ્રેનના ફૂટ બોર્ડ વચ્ચેની ગેપમાંથી ખેંચી લેતા જીવ બચી ગયો હતો. વીડિયો સોશિયલ મીડિયા પર વાઈરલ થયા પછી લોકોએ તેની પ્રશંસા કરી હતી.
આ ઘટના શુક્રવારે સીસીટીવીમાં કેદ થઈ હતી. લોકમાન્ય તિલક ટર્મિનસ (એલટીટી) પર કોચુવેલી ગરીબ રથ એક્સપ્રેસ (ટ્રેન નંબર 12201) પ્લેટફોર્મ નંબર ચાર પરથી ઉપડવાની હતી ત્યારે એક પ્રવાસીએ ચાલતી ટ્રેનમાં ચઢવાનો પ્રયાસ કર્યો હતો.
આપણ વાંચો: રેલવેના કર્મચારીએ ચાલતી ટ્રેનમાંથી પડનારા પ્રવાસીનો જીવ બચાવ્યો, વીડિયો વાઈરલ
એ વખતે પ્રવાસીનો પગ લપસી ગયો અને ટ્રેન અને પ્લેટફોર્મ વચ્ચેના ગેપમાં પડી ગયો. તે ગંભીર રીતે ઘાયલ થવાનો હતો ત્યારે જ એક RPF કોન્સ્ટેબલ ઝડપથી મુસાફર તરફ દોડી ગયો અને તેને બચાવી લીધો હતો.
સદનસીબે, ઘટના સમયે મુંબઈ ડિવિઝનના RPF કોન્સ્ટેબલ રામ નારાયણ સિંહ ફરજ પર હતા અને તેમણે તેમને તાત્કાલિક ગેપમાંથી બહાર કાઢ્યા હતા. જોકે, RPF અધિકારીએ બતાવેલી હિંમતને કારણે મુસાફરનો જીવ બચી ગયો.
આપણ વાંચો: પોલીસ નહીં પણ ટિકિટ ચેકરે મહિલા પ્રવાસીનો કંઇક આ રીતે બચાવ્યો જીવ, વીડિયો વાઇરલ…
આ ઘટના પછી પ્રવાસી ખૂબ જ ગભરાયેલો અને વ્યથિત હતો. પોલીસે તેની પૂછપરછ કરતા કહ્યું કે ઘરે કૌટુંબિક કટોકટી હોવાથી તે ગમે તેમ કરીને ટ્રેન પકડવા માંગતો હતો. બાદમાં, તેને તેના કાર્યોના પરિણામો સમજાવવામાં આવ્યા અને તે અંગે માર્ગદર્શન આપવામાં આવ્યું. ત્યારબાદ સ્ટેશન અધિકારીઓએ તે સુરક્ષિત ઘરે પરત ફરે તેની ગોઠવણ કરી આપી.
મધ્ય રેલવેના અધિકારીએ આરપીએફ કર્મચારીઓ અન્ય રેલવે કર્મચારીઓ દ્વારા રોજિંદા લાખો મુસાફરોની સલામતી માટે ભજવવામાં આવતી મહત્વપૂર્ણ ભૂમિકાને ઉજાગર કરતા સિંહના ઉદાહરણરૂપ વર્તનની પ્રશંસા કરી. રેલવે વહીવટીતંત્રે ફરી એકવાર મુસાફરોને ચાલતી ટ્રેનમાં ચઢવા કે ઉતરવાનું ટાળવાની અપીલ કરી છે, અને ભારપૂર્વક જણાવ્યું છે કે આવું વર્તન જીવલેણ સાબિત થઇ શકે છે.
