નરેશ શાહ
મહાભારતના સમયથી એ સાબિત થયું છે કે ‘આરંભ તેનો અંત’ અનિવાર્ય છે. શ્રીકૃષ્ણનો જન્મ જ અનેક આસુરી શક્તિ સામેના શંખનાદ જેવો હતો. 2004માં આઈઆઈટી પાસ કરીને પોલીસ બેડામાં નવા નવા સામેલ થયેલા અમિત લોઢાને કે કોઈને કલ્પના નહોતી કે એ જ અરસામાં ધીમે ધીમે વિકરાળ બની રહેલા એક ગેંગસ્ટર ચેપ્ટર પર પૂર્ણવિરામ મૂકવામાં એ નિમિત્ત બનશે.
બી.એસ.એફ. (બોર્ડર સિક્યોરિટી ફોર્સ)ના આઈજી તરીકે સેવા આપતા આ આઈપીએસ અધિકારીએ પોતાની કેરિયરના શરૂઆતના જ ચારેક વરસમાં બિહારની કુખ્યાત ગિરોહના સર્વેસર્વા સામંત પ્રતાપને આકરી મહેનત તેમજ અનેક જોખમ તેમજ પોલિટિકલ પ્રેશર વચ્ચે ઝબ્બે કર્યો હતો અને નીચલી અદાલતે તેને ફાંસીની સજા સંભળાવી હતી.
આઈપીએસ ઓફિસર અમિત લોઢાએ 2018માં જ પોતાની જિંદગીના યાદગાર કારનામાં પર એક પુસ્તક લખેલું. ‘પેંગ્વિન બુકસ’ જેવા પ્રતિષ્ઠિત પબ્લિકેશન હાઉસે પ્રગટ કરેલા એ પુસ્તકનું નામ હતુ:
બિહાર ડાયરી-‘ધ ટ્રુ સ્ટોરી ઓફ હાઉસ બિહારસ’ મોસ્ટ ડેન્જરસ ક્રિમિનલ વોઝ કેચ.
ગુનાખોરીના મોસાળ જેવા બિહારની આ સત્ય ઘટના પરથી (વેન્સ્ડે ફેઈમ) નિરજ પાંડેના પ્રોડકસન હાઉસે ‘ખાકી: બિહાર ચેપ્ટર’ નામની વેબસિરિઝ ‘નેટફલિક્સ’ માટે બનાવી છે. આ જ શ્રેણીમાં બનાવેલી ‘ખાકી: ધ બેંગાલ ચેપ્ટર’ પણ મજેદાર બની છે.
બેશક, તેમાં શેખપુરા જિલ્લાના સુપરિટેન્ડેન્ટ ઓફ પોલીસ તરીકે અમિત લોઢા (કરણ ટક્કર) જ છે પણ કુખ્યાત બિહારી ગેંગસ્ટર તરીકે વેબસિરીઝમાં ચંદન મહાતો (અવિનાશ તિવારી) છે, જેણે બિહારના જ બાહુબલીના ખાસ ગુર્ગા તરીકે વફાદારી દેખાડવામાં ત્રણ મર્ડરનો ઈલ્ઝામ પોતાની પર લઈને જેલ જવાનું પસંદ કરેલું.
જેલમાં ઈગો કલેશ થતાં તે શક્તિશાળી અને લોકલ ‘માથું’ ગણાતા રવિ કિશનનું રામનામ સત્ય કરી નાખે છે, પણ ઊંચી જ્ઞાતિના આગેવાનની હત્યાને કારણે ચંદન મહાતોની તેના સમાજ (અને કેદીઓમાં) ધાક બેસી જાય છે.
હવે ‘ચંદનવા’ અને ‘ચંદનભૈયા’નો ખિતાબ મળે છે. જેલમાં જ મળેલા પરિણીત સાથીદાર ચ્યવનપ્રાશ સાહુ (જતીન સરના) ચંદન મહાતોને પોતાની તાકાત, પ્રભાવનો પોતાના માટે ઉપયોગ કરવાની એડવાઈઝ આપે છે અને… ચંદન મહાતો સાથીદાર ચ્યવનપ્રાશ સાહુ સાથે કત્લેઆમ કરીને જેલમાંથી ભાગી છૂટે છે. હવે એ ખુદ ગેંગસ્ટર તરીકે કામ કરે છે. બિહાર (અને બીજાં રાજ્યોની જેમ) રાજકીય લોકો તેનો ઉપયોગ કરે છે.
દરમિયાન કોઈની ચુગલીથી ચંદન મહાતો તેનો એક સાગરીત ગુમાવી બેસે છે એટલે ચુગલખોરને સજા કરવા એ આખા માનિકપુર ગામ પર ગોળીઓ વરસાવી એકસાથે પચ્ચીસ હત્યા કરી નાખે છે. તેને હપ્તા દેવાનું બંધ કરનારા વેપારી – ધંધાદારીઓનો પણ સામૂહિક ખાતમો કરે છે એટલે સ્ટેટ પોલીસ તેને પકડવા માટે કામે લાગે છે.
‘ખાકી: ધ બિહાર ચેપ્ટર’માં પોલીસ અધિકારીઓના વિવિધ હોદ્દા પર આશુતોષ રાણા, અનુપ સોની, અભિમન્યુ સિંહ અને કરણ ટક્કર (અમિત લોઢા) જેના એકટર છે. 2006માં શેખપુરાના એસપી અમિત લોઢા કેવી કુનેહ, હિંમત તેમજ ચાલાકીથી ચંદન મહાતોને ઝડપી લે છે, એ ખરેખર રસપ્રદ વાત છે.
રાઈટર ખુદ નિરજ પાંડે અને ઉમાંશર સિંધ એ વેબસિરીઝમાં થોડી સિનેમેટિક લિર્બટી લીધી છે, પણ વાસ્તવિકતાને તેમણે જેમની તેમ દર્શાવી છે.
પોલીસ બેડામાં સસ્પેન્સ અને ડિસમિસ થવું, નેતાઓની ચાપલૂસી કરીને ઉચ્ચ હોદ્દા મેળવવા, ચૂંટણી પરિણામ પછી પોલીસ અધિકારીઓનું યુ ટર્ન મારવું અને કારણ વગરનો જશ લઈ લેવો…
જેવી વાતો ભાવ ધુલિયા નિર્દેશિત ‘ખાકી: ધ બિહાર ચેપ્ટર’ને રિયાલિસ્ટીક બનાવે છે તો પોલીસ અધિકારી તરીકે ધુરંધર કલાકારોની સામે ચંદન મહાતો તરીકે અવિનાશ તિવારીએ કાંટે કી ટક્કર લીધી છે. ગબ્બરસિંહની જેમ આ તળપદા ગેંગસ્ટરના દાંત પણ મેકઅપ કરીને ગોબરા દેખાડવામાં આવ્યા છે, એ નોંધાયા વગર રહેતું નથી.
આ વેબસિરીઝનું સૌથી રસપ્રદ પાસું તો તેનો કલાઈમેક્સ છે. ચંદન મહાતોના ફોન કોલ ખાનગીમાં સાંભળતી પોલીસ સમક્ષ એવો ભેદ ખૂલે છે કે, બધા હચમચી જાય.
એ પછી ચંદન પકડાઈ તો છે પણ કોર્ટમાં (નેચરલી) તેની સામે કોઈ ગવાહી આપતું નથી યા કોર્ટના કઠેડામાં આવીને સાક્ષીઓ પલટી મારી દે છે… એસપી અમિત લોઢા એ પછી એવી ગવાહી-સાક્ષી અદાલતને આપે છે કે કોર્ટ તેના આધારે ચંદન મહાતોને ફાંસીની સજા આપે છે.
જો કે ચંદન મહાતો એસપી અમિત લોઢાને કહે છે કે, હજુ હાઈ કોર્ટ-સુપ્રીમ કોર્ટ બાકી છે અને એ દરમિયાન હું જેલમાંથી ભાગી જ જઈશ એટલે તું અને તારો પરિવાર સાવધ રહેજો!
- પછી?
સત્યઘટના પર આધારિત ‘ ખાકી: ધ બિહાર ચેપ્ટર’ બીજી ક્રિમિનલ ડ્રામા જેવી નથી.
આ પણ વાંચો…ફિલ્મનામાઃ અમોલ પાલેકરે પણ લાગલગાટ ત્રણ સુપરહિટ ફિલ્મ આપી હતી!
