ઉદ્ધવ પાસે ભારત-પાકિસ્તાન મેચનો વિરોધ કરવાનો નૈતિક અધિકાર નથી: શિવસેના

(અમારા પ્રતિનિધિ તરફથી)
મુંબઈ: શિવસેનાએ શનિવારે સેના (યુબીટી)ના વડા ઉદ્ધવ ઠાકરેના ભારત-પાકિસ્તાન ક્રિકેટ મેચના વિરોધની ટીકા કરી હતી અને એવો દાવો કર્યો હતો કે કોંગ્રેસ સત્તામાં હતી ત્યારે બંને દેશોએ તણાવપૂર્ણ સંબંધો વચ્ચે આ રમત રમી હતી.
શિવસેના (યુબીટી)ને મેચનો વિરોધ કરવાનો કોઈ નૈતિક અધિકાર નથી. કોંગ્રેસના સમયમાં પણ સંબંધો તંગ હતા ત્યારે ભારત અને પાકિસ્તાન વચ્ચે આંતરરાષ્ટ્રીય ક્રિકેટ મેચ રમાતી હતી, એમ એકનાથ શિંદેની આગેવાની હેઠળની શિવસેનાના પ્રવક્તા અને સાંસદ નરેશ મ્હસ્કેએ થાણેમાં એક પત્રકાર પરિષદમાં જણાવ્યું હતું.

સત્તા માટે હિન્દુત્વનો ત્યાગ કરનારા અને પાકિસ્તાનના ગુણગાન ગાનારા ઠાકરે અચાનક આવી મેચોનો વિરોધ કરી શકતા નથી, એમ તેમણે જણાવ્યું હતું.

મ્હસ્કેએ ભારપૂર્વક જણાવ્યું હતું કે એનડીએ સરકાર હેઠળ પાકિસ્તાન પ્રત્યે ભારતનું વલણ યથાવત છે.
‘જ્યાં સુધી આતંકવાદ બંધ ન થાય ત્યાં સુધી સૌહાર્દપૂર્ણ સંબંધો બનાવી શકાતા નથી. એશિયા કપ મેચ રમવાનો અર્થ નીતિમાં ફેરફાર નથી. આઈપીએલના દરવાજા હજુ પણ પાકિસ્તાની ખેલાડીઓ માટે બંધ છે. આંતરરાષ્ટ્રીય સ્પર્ધાઓમાં આવી મેચો હંમેશા રમાતી રહી છે, જેમાં વર્લ્ડ કપ રમતોનો પણ સમાવેશ થાય છે,’ એમ મ્હસ્કેએ ઉમેર્યું હતું.

ઠાકરેના રાજકીય જોડાણોની ટીકા કરતા મ્હસ્કેએ કહ્યું હતું કે જેમની સામે આપણે ચૂંટણી લડી હતી તેમની સાથે સત્તામાં બેસવું એ ‘બેશરમી’ સમાન છે.

‘સત્તાની લાલચ માટે હિન્દુત્વનો ત્યાગ કરવો એ બેશરમી છે, અને ગુનેગારો અને બોમ્બ વિસ્ફોટના આરોપીઓ સાથે પ્રચાર કરવો એ પણ બેશરમી છે,’ એમ તેમણે ઉમેર્યું હતું.

સેના (યુબીટી)ના વિરોધ સૂત્ર ‘મારું સિંદુર, મારો દેશ’ પર પ્રતિક્રિયા આપતાં મ્હસ્કેએ જણાવ્યું હતું કે સૈનિકોની બહાદુરી પર શંકા કરનારા અને ‘ઓપરેશન સિંદૂર’ પર સવાલ ઉઠાવનારાઓને ‘સિંદૂર’ અથવા ‘સમ્માન’ વિશે બોલવાનો કોઈ અધિકાર નથી.

‘જે લોકોએ પાકિસ્તાનની પ્રશંસા કરીને ‘સિંદૂર’નું અપમાન કર્યું હતું તેઓ હવે તેને ફક્ત ચૂંટણી માટે યાદ કરી રહ્યા છે. જે લોકોએ પ્રચાર દરમિયાન આઈએસઆઈ એજન્ટોને સમર્થન આપ્યું હતું તેઓએ ચૂપ રહેવું જોઈએ,’ એમ થાણેના શિવસેના નેતાએ કહ્યું હતું.

મ્હસ્કેએ એવો આરોપ લગાવ્યો હતો કે પહલગામ આતંકવાદી હુમલા પછી ઉદ્ધવ ઠાકરે વિદેશ ગયા હતા અને ક્યારેય પીડિતોના પરિવારોને મળ્યા પણ નહોતા.

‘2019માં, તેઓએ ‘એક સાથે લગ્ન કરો, બીજા સાથે રહો’ના નારા સાથે પ્રચાર કર્યો. હવે તેમને ચૂંટણી પહેલા દેશભક્તિ યાદ આવી ગઈ છે. આંતરરાષ્ટ્રીય રાજકારણ તેમની સમજની બહાર છે,’ એમ જણાવતાં મ્હસ્કેએ કહ્યું હતું કે, વડા પ્રધાન નરેન્દ્ર મોદી અને ગૃહ પ્રધાન અમિત શાહના નેતૃત્વમાં, દેશની સુરક્ષા મજબૂત હાથમાં છે.

આ પણ વાંચો…બ્લોકબસ્ટર મેચ, લાગણીઓની મજાક: આદિત્યે એશિયા કપ ભારત-પાકિસ્તાન મેચ પર કેન્દ્ર સરકારની ટીકા કરી…