પુણે: તેજ ગતિથી દાડતી કાર મેટ્રો સ્ટેશનના પિલર સાથે ટકરાતાં બેનાં મોત નીપજ્યાં હતાં, જ્યારે એક ગંભીર રીતે ઘવાયો હોવાની ઘટના પુણે શહેરમાં બની હતી.
કોરેગાંવ પાર્ક પોલીસ સ્ટેશનનાં સિનિયર ઈન્સ્પેક્ટર સંગીતા જાધવે જણાવ્યું હતું કે ઘટના રવિવારના મળસકે 4.30 વાગ્યાની આસપાસ પુણેના બંડ ગાર્ડન વિસ્તારમાં બની હતી. ડ્રાઈવરે સ્ટિયરિંગ પરનો કાબૂ ગુમાવવાને કારણે આ અકસ્માત થયો હોવાનું પ્રથમદર્શી જણાય છે.
અકસ્માતમાં જીવ ગુમાવનારાઓની ઓળખ હૃતિક ભંડારી અને યશ ભંડારી તરીકે થઈ હતી. ઘટનામાં કુશવંત ટેકવાની ગંભીર રીતે ઘવાયો હોવાથી સારવાર માટે તેને હૉસ્પિટલમાં દાખલ કરાયો હતો.
અકસ્માત કઈ રીતે થયો તે જાણવા પોલીસે ઘટનાસ્થળે લાગેલા સીસીટીવી કૅમેરાનાં ફૂટેજ તપાસ્યાં હતાં.
પોલીસના જણાવ્યા મુજબ ફૂટેજ જોતાં સ્પષ્ટ થાય છે કે કાર ખૂબ જ સ્પીડમાં આવી હતી અને બંડ ગાર્ડન મેટ્રો સ્ટેશનના પિલર સાથે ભટકાઈ હતી. તે સમયે કારમાં ત્રણ જણ હતા. ડ્રાઈવરે સ્ટિયરિંગ પરનો કાબૂ ગુમાવતાં કાર પિલર સાથે ટકરાઈ હતી.
અકસ્માત થતાં જ સ્થાનિક રહેવાસીઓ મદદ માટે દોડી આવ્યા હતા. કારમાંના ત્રણેયને નજીકની હૉસ્પિટલમાં લઈ જવાયા હતા, જ્યાં બેને મૃત જાહેર કરાયા હતા. આ પ્રકરણે વધુ તપાસ કરવામાં આવી રહી છે, એમ અધિકારીએ જણાવ્યું હતું. (પીટીઆઈ)
