જાલના: જાલના જિલ્લાની સરકારી હોસ્પિટલમાં એક આશ્ર્ચર્યજનક ઘટના સામે આવી છે જેમાં સગર્ભા મહિલાના પેટ પર મેડિકલ જેલી લગાવવાના બદલે હાઇડ્રોલિક એસિડ લગાવવામાં આવ્યું હતું. આ ઘટના બાદ પ્રશાસન દ્વારા તપાસનો આદેશ આપવામાં આવ્યો છે, એમ સૂત્રોએ જણાવ્યું હતું.
જાલનાની ભોકરદનની સરકારી ગ્રામીણ હોસ્પિટલમાં બનેલી આ ઘટનામાં મહિલા ગંભીર રીતે દાઝી ગઇ હતી, એમ તેમણે વધુમાં જણાવ્યું હતું.
ખાપરખેડા ગામમાં રહેતી શીલા ભાલેરાવ પ્રસુતિ માટે હોસ્પિટલમાં દાખલ થઇ હતી ત્યારે નર્સે ભૂલમાં મેડિકલ જેલીના બદલે તેના પેટ પર હાઇડ્રોલિક એસિડનો ઉપયોગ કર્યો હતો. આ ઘટનામાં શીલા ગંભીર રીતે દાઝી ગઇ હતી અને તેના પેટ પર જખમ થઇ ગયું હતું. આટલી મોટી ભૂલ થવા છતાં શીલાએ સ્વસ્થ બાળકને જન્મ આપ્યો હતો, એમ સૂત્રોએ જણાવ્યું હતું.
સફાઇ કર્મચારી દ્વારા એસિડની બોટલ ભૂલમાં મેડિસિનની ટ્રેમાં મૂકી દેવામાં આવી હતી, એમ હોસ્પિટલના સૂત્રોએ જણાવ્યું હતું. ડિસ્ટ્રિક્ટ સિવિલ સર્જન ડો. આર. એસ. પાટીલે જણાવ્યું હતું કે બેદરકારીનો આ સૌથી ગંભીર કેસ છે. તેની વિસ્તૃત તપાસ કરવામાં આવશે અને આ માટે જે જવાબદાર હશે તેની સામે કડક કાર્યવાહી કરવામાં આવશે.
