દેશમાં સીધા વિદેશી રોકાણ માટે મહારાષ્ટ્ર પસંદગીનું રાજ્ય

(અમારા પ્રતિનિધિ તરફથી)
મુંબઈ: મહારાષ્ટ્રના રાજ્યપાલ સી.પી. રાધાકૃષ્ણને સોમવારે જણાવ્યું હતું કે રાજ્ય વિદેશી સીધા રોકાણ (એફડીઆઈ) માટે એક પસંદગીનું સ્થળ છે અને દેશના કુલ સ્થાનિક ઉત્પાદન (જીડીપી)માં 14 ટકાથી વધુ ફાળો આપે છે.

રાજ્યપાલે બજેટ સત્રના પહેલા દિવસે રાજ્ય વિધાનસભાના સંયુક્ત સત્રને સંબોધતા ભારપૂર્વક જણાવ્યું હતું કે મહારાષ્ટ્ર દેશના અગ્રણી ઔદ્યોગિક રાજ્યોમાંનું એક છે.

તેમણે કહ્યું હતું કે, રાજ્ય સરકારે જાન્યુઆરીમાં સ્વિટ્ઝર્લેન્ડના દાવોસમાં વર્લ્ડ ઇકોનોમિક ફોરમ દરમિયાન 63 રાષ્ટ્રીય અને આંતરરાષ્ટ્રીય કંપનીઓ સાથે આશરે 15.72 લાખ કરોડ રૂપિયાના સમજૂતી કરાર (એમઓયુ) પર હસ્તાક્ષર કર્યા છે અને આ રોકાણો 15 લાખથી વધુ રોજગારીની તકો ઉભી કરશે.

આપણ વાંચો: રોકાણકારો, આજા… ફસા જા વાયા સોશ્યલ મીડિયા!

રાધાકૃષ્ણને જણાવ્યું હતું કે, રાજ્ય સરકાર મહારાષ્ટ્ર-કર્ણાટક સરહદ વિવાદ ઉકેલવા માટે પ્રતિબદ્ધ છે અને સુપ્રીમ કોર્ટ સમક્ષ મહારાષ્ટ્રનું પ્રતિનિધિત્વ કરવા માટે નિષ્ણાત વકીલોની નિમણૂક કરી છે.

‘મહારાષ્ટ્ર એફડીઆઈ માટે એક પસંદગીનું સ્થળ છે અને દેશના જીડીપીમાં 14 ટકાથી વધુ ફાળો આપે છે,’ એમ રાજ્યપાલે જણાવ્યું હતું.

તેમણે નોંધ્યું હતું કે રાજ્ય સરકાર મહારાષ્ટ્રમાં ઉદ્યોગોને રોકાણ આકર્ષવા, ઔદ્યોગિક વિકાસને પ્રોત્સાહન આપવા અને રોજગારીની તકો ઉભી કરવા માટે લગભગ 5,000 કરોડ રૂપિયાની રોકાણ પ્રોત્સાહન સબસિડી આપવાની યોજના ધરાવે છે.

રાધાકૃષ્ણને જણાવ્યું હતું કે, સરકારે મહારાષ્ટ્ર ઔદ્યોગિક વિકાસ નિગમ દ્વારા ઔદ્યોગિકીકરણને ટેકો આપવા અને પ્રોત્સાહન આપવા માટે આશરે 3,500 એકર જમીન ફાળવવાનો નિર્ણય લીધો છે અને ઔદ્યોગિક હેતુઓ માટે 10,000 એકર જમીનને સૂચિત કરશે.

આપણ વાંચો: નાના રોકાણકારોનો પાયો વિસ્તરવાનો વેગ વધી રહ્યો છે!

તેમણે વધુમાં જણાવ્યું હતું કે, સરકાર ઔદ્યોગિક વિકાસ વધારવા, સપ્લાય ચેઇનની કાર્યક્ષમતા સુધારવા અને વિશ્ર્વ કક્ષાની વ્યવસાયિક ઇકોસિસ્ટમ બનાવવા માટે 10 સંકલિત ઔદ્યોગિક ઉદ્યાનો અને સંકલિત લોજિસ્ટિક્સ પાર્ક વિકસાવવાની યોજના ધરાવે છે.

રાજ્યપાલે જણાવ્યું હતું કે સરકારે કાપડ ક્ષેત્રને મજબૂત અને વિસ્તૃત કરવા માટે મહારાષ્ટ્ર ટેકનિકલ ટેક્સટાઇલ મિશન શરૂ કરવાની મંજૂરી આપી છે.

તેમણે કહ્યું કે મુખ્ય પ્રધાન યુવા કાર્ય તાલીમ યોજના હેઠળ 1.32 લાખથી વધુ યુવાનોને તાલીમ આપવામાં આવી છે, જેનો ઉદ્દેશ્ય રોજગારક્ષમતા વધારવા અને ઉદ્યોગોને કુશળ માનવશક્તિ પૂરી પાડવાનો છે.

સરકારે 2024-25માં 10 લાખ યુવાનોને તાલીમ આપવાનું લક્ષ્ય રાખ્યું છે અને આ માટે 5,500 કરોડ રૂપિયા ફાળવ્યા છે, એમ તેમણે ઉમેર્યું હતું.

આપણ વાંચો: મહારાષ્ટ્રના ગવર્નર કહે છે કે લાડકી બહેન યોજના ચાલુ રહેશે

રાધાકૃષ્ણને કહ્યું હતું કે, સરકારે 2024-25માં મહારાષ્ટ્રના જિલ્લાઓમાં 611 પંડિત દીનદયાળ રોજગાર મેળાઓનું આયોજન કર્યું હતું અને 19,000થી વધુ ઉમેદવારોને નોકરીઓ મળી છે.

માળખાગત વિકાસ વિશે બોલતા, રાજ્યપાલે કહ્યું હતું કે સરકાર નાગપુર-ગોવા શક્તિપીઠ એક્સપ્રેસવેનું નિર્માણ કરશે, જે રૂટ પરના મુખ્ય ધાર્મિક અને તીર્થસ્થળોને જોડશે.

‘એક્સપ્રેસવે મુસાફરીનો સમય ઘટાડશે અને પ્રદેશમાં આર્થિક વિકાસને વેગ આપશે. તે 86,300 કરોડ રૂપિયાના અંદાજિત ખર્ચે બનાવવામાં આવશે,’ એમ તેમણે કહ્યું હતું.

તેમણે જણાવ્યું હતું કે, સરકારે નાસિકમાં રામ કાલ પથ પ્રોજેક્ટ અમલમાં મૂકવાનો પણ નિર્ણય લીધો છે જેથી પ્રદેશના રામાયણ સાથે જોડાયેલા વારસાને જાળવી રાખી શકાય અને તેને તીર્થસ્થાનમાં રૂપાંતરિત કરી શકાય.

આપણ વાંચો: વીમા ક્ષેત્રે ધરખમ પરિવર્તનના પડઘમ

તેમણે વધુમાં જણાવ્યું હતું કે સરકાર નગરોત્થાન મહાભિયાનને અસરકારક રીતે અમલમાં મૂકવા માટે પ્રતિબદ્ધ છે, જેનો ઉદ્દેશ શહેરી વિસ્તારોમાં પાણી પુરવઠા, ગટર અને વિકાસ માટે ચાલુ પ્રોજેક્ટ્સ બે વર્ષમાં પૂર્ણ કરવાનો છે.

રાજ્યપાલે જણાવ્યું હતું કે 38 પ્રોજેક્ટ્સ માટે પીપીપી ધોરણે પમ્પ્ડ સ્ટોરેજ પ્રોજેક્ટ્સ લાગુ કરીને વીજળી સંગ્રહ અને ગ્રીડ સ્થિરતા માટે 13 એજન્સીઓ સાથે એમઓયુ પર હસ્તાક્ષર કરવામાં આવ્યા છે.

તેમણે કહ્યું કે આ પ્રોજેક્ટ્સ 55,970 મેગાવોટ વીજળી ઉત્પન્ન કરશે, અને મહારાષ્ટ્રને 2.95 લાખ કરોડ રૂપિયાનું રોકાણ મળવાની અને 90,000 થી વધુ રોજગારીની તકો ઉભી થવાની અપેક્ષા છે.

સરકારે ‘માગેલ ત્યાલા સૌર પંપ’ યોજનાના ભાગ રૂપે 3.12 લાખ સૌર સિંચાઈ પંપ સ્થાપિત કર્યા છે, જેના હેઠળ પાંચ વર્ષમાં ખેડૂતોને 10 લાખ સૌર પંપ પૂરા પાડવામાં આવશે, એમ તેમણે જણાવ્યું હતું.

આપણ વાંચો: મહારાષ્ટ્ર ઉદ્યોગ અને ઈન્ફ્રાસ્ટ્રક્ચરની દ્રષ્ટિએ દેશમાં અગ્રેસર: એકનાથ શિંદે

રાધાકૃષ્ણને જણાવ્યું હતું કે, મહારાષ્ટ્રે પીએમ-કુસુમ અને મુખ્યમંત્રી સૌર કૃષિ વાહિની યોજનાઓ હેઠળ તમામ કૃષિ ફીડરોને સૌર ઊર્જાથી ઉર્જા આપનાર દેશનું પ્રથમ રાજ્ય બનવાનું લક્ષ્ય રાખ્યું છે, અને નવ મહિનામાં 147 મેગાવોટની સંયુક્ત સૌર ઊર્જા ક્ષમતાવાળા 119 ફીડર કાર્યરત કરવામાં આવ્યા છે.

આવાસ ક્ષેત્રમાં, સરકાર 409 શહેરી ક્લસ્ટરોમાં પ્રધાનમંત્રી આવાસ યોજના (શહેરી) લાગુ કરી રહી છે. બે લાખથી વધુ ઘરો બનાવવામાં આવ્યા છે, અને 1.85 લાખથી વધુ ઘરો માટે કામ ચાલી રહ્યું છે, એમ તેમણે જણાવ્યું હતું.

તેમણે કહ્યું હતું કે પ્રધાનમંત્રી આવાસ યોજના – ગ્રામીણના પ્રથમ તબક્કામાં 12.64 લાખથી વધુ ઘરો બનાવવામાં આવ્યા છે, જ્યારે બીજા તબક્કામાં 16.81 લાખથી વધુ ઘરો બનાવવામાં આવશે.

રાજ્યપાલે કહ્યું કે રાજ્ય સરકારે ડિજિટલ સેવાઓનો ઉપયોગ કરીને ખેડૂતોને સરકારી યોજનાઓ ઝડપી અને અસરકારક રીતે પહોંચાડવા માટે એગ્રીસ્ટેક યોજના શરૂ કરી છે.

તેમણે કહ્યું હતું કે, સરકારે પ્રધાનમંત્રી કિસાન સન્માન યોજના હેઠળ 95 લાખથી વધુ ખેડૂતોને લાભાર્થી તરીકે પસંદ કર્યા છે અને 87 લાખથી વધુ ખેડૂતોને કિસાન ક્રેડિટ કાર્ડ આપવામાં આવ્યા છે.