છત્રપતિ સંભાજીનગર: ભાજપના વિધાનસભ્ય સુરેશ ધસે શનિવારે એવી માગણી કરી હતી કે ફલટણમાં આત્મહત્યા કરનારી 28 વર્ષની મહિલા ડોક્ટર પર દબાણ કરવાનો પ્રયાસ કરનાર સાંસદને આ કેસમાં આરોપી બનાવવામાં આવે.
બીડની રહેવાસી અને સરકારી હોસ્પિટલમાં ફરજ બજાવતી આ ડોક્ટર ગુરુવારે રાત્રે સાતારા જિલ્લાના ફલટણમાં એક હોટલના રૂમમાં લટકતી હાલતમાં મળી આવી હતી.
‘તપાસમાં ખબર પડશે કે સાંસદ અને તેના સાથીઓ કોણ છે જે તેમને ધમકી આપવામાં સામેલ છે. જો તેઓ સંડોવાયેલા હોય, તો તેઓ કોઈ પણ હોય, તેમને આ કેસમાં આરોપી બનાવવામાં આવે,’ એમ બીડ જિલ્લાના આષ્ટીના વિધાનસભ્ય ધસે જણાવ્યું હતું.
ડોક્ટરના કથિત જવાબ મુજબ, એક સાંસદના અંગત સહાયકોએ તેને ફોન પર વાત કરવા કહ્યું હતું અને ત્યારબાદ સાંસદે તેના પર આરોપ લગાવ્યો હતો કે તે બીડની રહેવાસી હોવાથી ધરપકડ કરાયેલ વ્યક્તિને ફિટનેસ સર્ટિફિકેટ (જેના કારણે પોલીસ તેની કસ્ટડી માગી શકતી હતી) આપતી નહોતી.
ધસે તેના મૃત્યુની સ્વતંત્ર તપાસ અને ભૂતકાળમાં તેણીની ફરિયાદોને ધ્યાનમાં ન લેનારાઓ સામે કાર્યવાહી કરવાની પણ માગણી કરી હતી.
દરમિયાન, મહિલા ડોક્ટરનો શુક્રવારે રાત્રે બીડના વડવાની તાલુકામાં તેના વતન ખાતે અંતિમ સંસ્કાર કરવામાં આવ્યો હતો.
માજલગાંવના વિધાનસભ્ય અને એનસીપીના નેતા પ્રકાશ સોલંકે તેના પરિવારના સભ્યોને મળ્યા હતા જેમણે કેસની તપાસ માટે ખાસ તપાસ ટીમની માગણી કરી હતી.
તે માનસિક રીતે મજબૂત હતી અને જો તેને ગંભીર હેરાનગતિનો સામનો કરવો પડ્યો ન હોત તો તે આત્મહત્યા ન કરે, એમ તેમણે જણાવ્યું હતું.
મહિલાના બે પિતરાઈ ભાઈઓ, જે ડોક્ટર પણ હતા, તેમણે આરોપ લગાવ્યો હતો કે હોસ્પિટલ વહીવટીતંત્રે જાણી જોઈને તેને માત્ર હેરાન કરવા માટે પોસ્ટમોર્ટમની ફરજો સોંપી હતી.
મહિલાના પરિવારના જણાવ્યા મુજબ, તે એમડી કોર્સ કરવા માગતી હતી અને તેના માટે તૈયારી કરી રહી હતી.
તેના કાકાએ સમાચાર સંસ્થાને જણાવ્યું હતું કે, તેના એમબીબીએસ કોર્સ માટે લેવામાં આવેલું ત્રણ લાખ રૂપિયાનું દેવું હજુ ચૂકવવાનું બાકી છે.
તેના પિતા ખેડૂત છે, તે શિક્ષિત નથી. હું શિક્ષક છું અને હું તેને શાળા શિક્ષણ માટે બીડ લઈ ગયો હતો. તે એમબીબીએસથી સંતુષ્ટ નહોતી, દવા, ઇએનટી અથવા નોન-ક્લિનિકલ શાખાઓમાં એમડી કરવા માગતી હતી, એમ તેમણે કહ્યું હતું.
તેના પરિવારના સભ્યોએ તેને બીડમાં કામ કરવા કહ્યું, પરંતુ તેણે અભ્યાસ માટે થોડો સમય મળી શકે તે માટે ફલટણમાં રહેવાનું પસંદ કર્યું હતું, એમ તેના કાકાએ જણાવ્યું હતું. (પીટીઆઈ)
