દેવેન્દ્ર ફડણવીસે તુર્કીના સફરજનનો બહિષ્કાર કરવા બદલ પુણેના વેપારીઓની પ્રશંસા કરી

પાકિસ્તાનથી કથિત રીતે ધમકી સંદર્ભમાં તેમણે કહ્યું કે વેપારીઓએ આવી ધમકીઓથી ડરવાની જરૂર નથી
પુણે: મહારાષ્ટ્રના મુખ્ય પ્રધાન દેવેન્દ્ર ફડણવીસે ગુરુવારે પુણેના વેપારીઓને પાકિસ્તાનને સમર્થન આપવાના વિરોધમાં તુર્કીથી સફરજન અને સૂકા ફળોની આયાત બંધ કરીને ‘રાષ્ટ્ર પ્રથમ’નું વલણ અપનાવવા બદલ અભિનંદન આપ્યા હતા.

પાકિસ્તાન અને પાકિસ્તાનના કબજા હેઠળના કાશ્મીરમાં આતંકવાદી માળખા પર ભારતના હુમલાઓની તુર્કીએ ટીકા કર્યા બાદ, અહીંના એપીએમસી માર્કેટના ફળના વેપારીઓએ તુર્કીથી આવતા સફરજન અને અન્ય ઉત્પાદનોનો બહિષ્કાર કરવાનો નિર્ણય લીધો હતો.

આપણ વાંચો: ટર્કિશ સફરજનના બહિષ્કારની હાકલ: પુણેના વેપારીએ દાવો કર્યો છે કે પાકિસ્તાન તરફથી ધમકી મળે છે

‘તુર્કીથી થતી આયાતનો બહિષ્કાર કરવાનો નિર્ણય લેનારા તમામ વેપારીઓને હું અભિનંદન આપું છું. આ સમયે, ‘રાષ્ટ્ર પ્રથમ’એ આપણું વલણ હોવું જોઈએ. પહલગામમાં હત્યાકાંડનું કરનારાઓને જ નહીં, પરંતુ તેમને ટેકો આપનારા દેશોને પણ પાઠ ભણાવવાની જરૂર છે. નાગરિકોમાં ‘રાષ્ટ્ર પ્રથમ’ની આ કુદરતી લાગણીનું હું સ્વાગત કરું છું,’ એમ ફડણવીસે ઉમેર્યું હતું.

પાકિસ્તાનથી કથિત રીતે ધમકીભર્યો ફોન આવતા એક વેપારીના સંદર્ભમાં તેમણે કહ્યું કે વેપારીઓએ આવી ધમકીઓથી ચિંતા કરવાની જરૂર નથી.

‘ભારત એક એવો દેશ છે જેણે પાકિસ્તાનમાં ઘૂસીને તેને બરબાદ કરી દીધું છે. ધ ન્યૂયોર્ક ટાઈમ્સે પણ ભારત દ્વારા થયેલા વિનાશની સેટેલાઇટ છબીઓ પ્રકાશિત કરીને પાકિસ્તાનનો પર્દાફાશ કર્યો છે.

બીજી બાજુ, પાકિસ્તાન આપણને કોઈ નુકસાન પહોંચાડી શક્યું નથી. ખાલી ધમકીઓનો શિકાર બનવાની કોઈ જરૂર નથી. સરકાર રક્ષણ પૂરું પાડશે, અને દરેકે ‘રાષ્ટ્ર પ્રથમ’ના વલણ પર અડગ રહેવું જોઈએ,’ એમ તેમણે ઉમેર્યું હતું.