નાગપુરઃ મહારાષ્ટ્રમાં BMC સહિત 29 મ્યુનિસિપલ કોર્પોરેશનો માટે આજે ચૂંટણી પ્રચારનો છેલ્લો દિવસ છે. મહારાષ્ટ્રના મુખ્ય પ્રધાન દેવેન્દ્ર ફડણવીસે નાગપુરમાં બાઇક રોડ શોનું આયોજન કર્યું હતું. મુખ્ય પ્રધાને હેલ્મેટ પહેરીને બાઇક પર રોડ શોમાં ભાગ લીધો હતો. રોડ શો દરમિયાન તેમણે કહ્યું કે મુંબઈમાં તો મહાયુતિ (મહાગઠબંધન)નો મેયર હશે.
મુખ્યમંત્રી ફડણવીસે ક્યાં રોડ શો કર્યો હતો?
મ્યુનિસિપલ ચૂંટણીનો પ્રચાર સમાપ્ત થાય તે પહેલાં, મહારાષ્ટ્રના મુખ્યપ્રધાન દેવેન્દ્ર ફડણવીસે તેમના હોમ ટાઉન નાગપુરમાં કડક સુરક્ષા વ્યવસ્થા હેઠળ રોડ શો કર્યો હતો. તેમનો રોડ શો ભારત માતા ચોકથી શરૂ થયો હતો અને વિવિધ માર્ગો પર પસાર થઈને મહાલમાં શિવાજી મહારાજની પ્રતિમા પાસે સમાપ્ત થયો હતો.
મુખ્ય પ્રધાનના રોડ શો માટે નાગપુરના બડકસ ચોકને ભવ્ય રીતે શણગારવામાં આવ્યો હતો. તમને જણાવી દઈએ કે રાષ્ટ્રીય સ્વયંસેવક સંઘ (RSS) નું મુખ્યાલય બડકસ ચોકથી માત્ર 200 મીટર દૂર છે. મહારાષ્ટ્રના મુખ્ય પ્રધાનના રોડ શોના થોડા સમય પહેલા, RSSના વડા ડૉ. મોહન ભાગવતનો કાફલો પણ આ માર્ગ પરથી પસાર થયો હતો.
આ પણ વાંચો : ઈલેક્શન-તૂ તૂ મૈં મૈંઃ ઉદ્ધવ ઠાકરેના એક લાખના પડકાર સામે ફડણવીસે કહ્યું તત્કાળ પૈસા મોકલો…
નાગપુરમાં, રોડ શો જ્યાંથી પસાર થયો તે દરેક સ્થળે ભવ્ય સજાવટ કરવામાં આવી હતી. વડા પ્રધાન, ભાજપના રાષ્ટ્રીય અધ્યક્ષ, ભાજપના કાર્યકારી પ્રમુખ, કેન્દ્રીય પ્રધાન નીતિન ગડકરી, મહારાષ્ટ્રના મુખ્ય પ્રધાન દેવેન્દ્ર ફડણવીસ અને અન્ય ઘણા નેતાઓના પોસ્ટરો લગાવવામાં આવ્યા હતા અને ભારતીય જનતા પાર્ટીનો ધ્વજ પણ લહેરાતો હતો.
તમને જણાવી દઈએ કે, બૃહન્મુંબઈ મ્યુનિસિપલ કોર્પોરેશન (BMC) સહિત રાજ્યના 29 મ્યુનિસિપલ કોર્પોરેશનોની ચૂંટણી 15 જાન્યુઆરીએ એક જ તબક્કામાં યોજાશે. 16 જાન્યુઆરીએ મતગણતરી થશે.
આ મ્યુનિસિપલ કોર્પોરેશનોમાં કુલ 2,869 બેઠકો માટે મતદાન થશે, જેમાં બૃહન્મુંબઈ મ્યુનિસિપલ કોર્પોરેશન (BMC) ની 227 બેઠકોનો સમાવેશ થાય છે. ચૂંટણીમાં 3.48 કરોડથી વધુ મતદારો તેમના મતાધિકારનો ઉપયોગ કરવા માટે પાત્ર છે.
