સપકાળનો આરોપ છે કે અજિત પવાર દ્વારા વક્ફ બિલને ટેકો આપવો એ તેમનો દંભ અને સત્તા માટે લાચારી દર્શાવે છે
મુંબઈ: મહારાષ્ટ્ર કોંગ્રેસના પ્રમુખ હર્ષવર્ધન સપકાળે શુક્રવારે કહ્યું હતું કે નાયબ મુખ્ય પ્રધાન અજિત પવાર દ્વારા વક્ફ (સુધારા) બિલને ટેકો આપવો એ સત્તા માટે તેમની લાચારીનો સંકેત છે અને તેમના રાજકારણનો દંભ દર્શાવે છે.
તેમણે એમ પણ કહ્યું હતું કે વકફ (સુધારા) બિલ ભારતીય જનતા પાર્ટી (ભાજપ) સરકારનું મુસ્લિમ સમુદાયને ડરાવવા અને હજારો એકર જમીન કબજે કરવાની યુક્તિ છે. અજિત પવારના નેતૃત્વમાં રાષ્ટ્રવાદી કોંગ્રેસ પાર્ટી (એનસીપી) એ સંસદમાં બિલને ટેકો આપ્યો હતો.
‘વક્ફ (સુધારા) બિલને અજિત પવારનો ટેકો સત્તા માટે તેમની લાચારીનો સંકેત છે. તેમનો ધર્મનિરપેક્ષ માસ્ક ફાટી ગયો છે અને તેમણે મુસ્લિમ સમુદાય સાથે દગો કર્યો છે,’ એમ સપકાળે પત્રકારોને જણાવ્યું હતું.
આપણ વાંચો: વક્ફ સંશોધન બિલના વિરોધમાં થઈ સુપ્રીમ કોર્ટમાં અરજી, કૉંગ્રેસે લગાવ્યો આવો આરોપ…
ભારતીય જનતા પાર્ટી (ભાજપ) સાથે જોડાણ કરીને સરકારમાં જોડાયા હોવા છતાં, અજિત પવાર અને તેમની એનસીપીએ દાવો કર્યો હતો કે તેમણે છત્રપતિ શિવાજી મહારાજ, શાહુ મહારાજ, મહાત્મા ફૂલે અને ડો. બાબાસાહેબ આંબેડકરનો વારસો છોડ્યો નથી. જોકે, તેમનો સાચો ચહેરો હવે ઉઘાડોે પડી ગયો છે, એમ તેમણે આરોપ લગાવ્યો હતો.
ભાજપની આગેવાની હેઠળની સરકારના વક્ફ બિલને ટેકો આપીને, અજિત પવારે સત્તા ખાતર ભાજપ સમક્ષ સંપૂર્ણપણે શરણાગતિ સ્વીકારી લીધી છે. તેમણે ભાજપની મદદથી પક્ષનું નામ અને પ્રતીક લઈને તેમના કાકા શરદ પવાર સાથે દગો કર્યો જ નહીં, પરંતુ સત્તા માટે સાંપ્રદાયિક શક્તિઓ સાથે પણ જોડાણ કર્યું, એમ કોંગ્રેસના નેતાએ નાયબ મુખ્યમંત્રી પર પ્રહારો કર્યા.
‘અજિત પવાર દાવો કરવાનું ચાલુ રાખે છે કે મહાયુતિ સરકારમાં તેમની ભાગીદારી વિકાસ માટે છે અને તેમણે પ્રગતિશીલ આદર્શોને છોડી દીધા નથી. જો કે, તેમના કાર્યો એક અલગ વાર્તા કહે છે,’ એમ તેમણે કહ્યું હતું.
‘એક ઇફ્તાર પાર્ટીમાં, તેમણે બોલ્ડ જાહેરાતો કરી હતી કે મુસ્લિમ સમુદાયને હેરાન કરનારાઓને છોડવામાં આવશે નહીં કે માફ કરવામાં આવશે નહીં, પરંતુ થોડા દિવસોમાં, તેમની એનસીપીએ વકફ બિલને ટેકો આપ્યો, જેનાથી મુસ્લિમ સમુદાય સાથે દગો થયો,’ એમ તેમણે કહ્યું હતું.
આ બિલ ભાજપ સરકાર દ્વારા મુસ્લિમ સમુદાયને ડરાવવા અને હજારો એકર જમીન કબજે કરવા માટે એક કાવતરું છે, એમ તેમણે કહ્યું હતું. ભાજપ સરકારે ધારાવી સહિતની મુખ્ય મિલકતો એક ચોક્કસ ઉદ્યોગપતિને સોંપવાનો માર્ગ પહેલેથી જ નક્કી કરી લીધો છે.
વકફ જમીનો હસ્તગત કર્યા પછી, આ સરકાર તેમને તેમના મનપસંદ ઉદ્યોગપતિઓને સોંપી દેશે. વરિષ્ઠ નેતા અજિત પવાર આ વાતથી સંપૂર્ણપણે વાકેફ છે, છતાં તેઓ સત્તાથી દૂર રહી શકતા નથી. તેમણે ભાજપ સામે ઝૂકીને બિલને ટેકો આપ્યો છે, એવો સપકાળનો આરોપ છે.
‘અજિત પવારના કાર્યો તેમના રાજકારણના દંભને છતો કરે છે. તેઓ જે ઉપદેશ આપે છે અને જે કરે છે તે સંપૂર્ણપણે અલગ છે. લોકોએ આ છેતરપિંડી ઓળખવી જોઈએ અને સાવધ રહેવું જોઈએ,’ એવી તેમણે ચેતવણી આપી હતી.