Manipur પછી આ રાજ્યમાં પણ ચૂંટણી પંચ કરાવશે ફરીથી મતદાન
નવી દિલ્હીઃ મણિપુર બાદ ભારતના ચૂંટણી પંચે અરુણાચલ પ્રદેશમાં પણ ફરીથી મતદાન કરાવવાનો નિર્ણય લીધો છે. અરુણાચલ પ્રદેશમાં આઠ મતદાન મથકો પર પુનઃ મતદાન હાથ ધરવામાં આવશે. અરુણાચલ પ્રદેશમાં 19 એપ્રિલે પ્રથમ તબક્કાના મતદાન દરમિયાન અનેક મતદાન મથકો પર હિંસા થઈ હતી. આ પછી ચૂંટણી પંચે આ કેન્દ્રો પર ફરીથી મતદાન કરાવવાનો નિર્ણય લીધો છે. અહીં 19 એપ્રિલે યોજાયેલ મતદાન માન્ય રહેશે નહીં. અરુણાચલ પ્રદેશમાં લોકસભાની સાથે વિધાનસભા ચૂંટણી માટે 19 એપ્રિલે રાજ્યભરમાં મતદાન થયું હતું.
ચૂંટણી પંચના અધિકારીએ જણાવ્યું કે અરુણાચલ પ્રદેશમાં વિધાનસભા ચૂંટણીના મતદાન દરમિયાન હિંસા અને ઈવીએમને નુકસાન થયાના અહેવાલો છે. ચૂંટણી પંચે આઠ મતદાન મથકો પર 19 એપ્રિલના રોજ થયેલ મતદાનને અમાન્ય જાહેર કર્યું છે અને 24 એપ્રિલે પુનઃ મતદાનની તારીખ નક્કી કરી છે. નાયબ મુખ્ય ચૂંટણી અધિકારી લિકેન કોયુએ જણાવ્યું કે રાજ્યના આઠ મતદાન મથકો પર સવારે 6 વાગ્યાથી બપોર સુધી મતદાન થશે.
આપણ વાંચો: Manipur Violence: મણિપુર પોલીસના કમાન્ડોએ ‘હથિયાર નીચે’ મુક્યા, જાણો શું છે કારણ
ચૂંટણી પંચે પૂર્વ કામેંગ જિલ્લાના બામેંગ વિધાનસભા મતવિસ્તારમાં સરિયો, કુરુંગ કુમેયના ન્યાપિન વિધાનસભા મતવિસ્તારના લોંગટે લોથ, અપર સુબાનસિરી જિલ્લાના નાચો મતવિસ્તારના ડીંગસેર, બોગિયા સિયુમ, જિમ્બારી અને લેંગી, સિયાંગના રુમગોંગ વિધાનસભા ક્ષેત્રના બોગને અને મોલોમને જાહેર કર્યા છે. જિલ્લાના મતદાન મથકો પર પુન: મતદાન યોજવાનું નક્કી કરવામાં આવ્યું છે. અરુણાચલ પ્રદેશમાં 50 ધારાસભ્યોની પસંદગી માટે 19 એપ્રિલે મતદાન થયું હતું. અહીં મતદાનની ટકાવારી 76.44 રહી હતી. રાજ્યમાં 60 વિધાનસભા બેઠકો છે, પરંતુ અપક્ષ ઉમેદવારોએ 10 બેઠકો જીતી છે.
મણિપુરમાં છેલ્લા એક વર્ષમાં ઘણી હિંસા થઈ છે. બે સમુદાયો વચ્ચે સતત સંઘર્ષ ચાલી રહ્યો છે, જેના કારણે ઘણા લોકોએ જીવ ગુમાવ્યા છે અને સેંકડો પરિવારો પણ પ્રભાવિત થયા છે. હવે હજારો લોકોને તેમના ઘર છોડીને રાહત શિબિરોમાં રહેવાની ફરજ પડી છે. આવી સ્થિતિમાં અહીં ચૂંટણીને લઈને બહુ ઉત્સાહ જોવા મળ્યો ન હતો. તમામ ઉમેદવારોએ શાંતિપૂર્ણ પ્રચાર કર્યો હતો. ચૂંટણી પંચને પહેલાથી જ મતદાન દરમિયાન હિંસાનો ડર હતો.
આ કારણોસર, આઉટર મણિપુર સીટ પર બે તબક્કામાં મતદાન કરાવવાનો નિર્ણય લેવામાં આવ્યો હતો જેથી કાયદો અને વ્યવસ્થા જાળવવામાં આવે અને દરેકની સુરક્ષા સુનિશ્ચિત કરીને નિષ્પક્ષ રીતે મતદાન થઈ શકે. જોકે આંતરિક મણિપુરમાં એક જ તબક્કામાં મતદાન થવાનું હતું, પરંતુ અહીં પણ અનેક બૂથ પર હિંસા થઈ હતી. આ પછી પંચે 11 બૂથ પર ફરીથી મતદાન કરાવવાનો નિર્ણય લીધો હતો.