યુએસ ઉપરાષ્ટ્રપતિ કમલા હેરિસે દિવાળીની ઉજવણી કરી
વોશિંગ્ટન ડીસી: દિવાળીના તહેવારની ઉજવણી ભારત ઉપરાંત દુનિયા ભરમાં થઇ રહી છે. ત્યારે ભારતીય મૂળના અમેરિકી ઉપરાષ્ટ્રપતિ કમલા હેરિસે તેમના સત્તાવાર નિવાસસ્થાને દિવાળીની ઉજવણી કરી હતી. આ ઉજવણીમાં 300 જેટલા લોકોએ ભાગ લીધો હતો. આ દરમિયાન, તેમણે મહેમાનોને કહ્યું કે આ પ્રકાશનો તહેવાર ઉજવવો ખૂબ જ મહત્વપૂર્ણ છે કારણ કે ઇઝરાયેલ-હમાસ યુદ્ધને કારણે વિશ્વ આજે મુશ્કેલ અને અંધકારમય સમયનો સામનો કરી રહ્યું છે.
ભારતીય મૂળના કમલા હેરિસે મંગળવારે તેના નિવાસસ્થાને દિવાળીની ઉજવણી કરી હતી. તેમણે આમંત્રિત મહેમાનોને સંબોધતા કહ્યું, ‘આપણે એવા સમયે દિવાળીની ઉજવણી કરી રહ્યા છીએ જ્યારે દુનિયામાં ઘણું બધું થઈ રહ્યું છે. મને લાગે છે કે આપણે દિવાળી ઉજવીએ તે ખૂબ જ મહત્વપૂર્ણ છે. આ તહેવાર પ્રકાશની ઉજવણી છે.’
તેમણે કહ્યું, ‘ચોક્કસપણે હાલ મુશ્કેલ સમય ચાલી રહ્યો છે. આપણે ઘણી સમસ્યાઓનો સામનો કરી રહ્યા છીએ, ખાસ કરીને ઇઝરાયેલ અને ગાઝાથી આવી રહેલા અહેવાલો જોઈને ખૂબ જ દુઃખ થાય છે. આપણા બધા માટે તે હૃદયદ્રાવક છે.’
તેમણે આગળ કહ્યું, ‘ હું એ સ્પષ્ટ કરવા માંગુ છું કે રાષ્ટ્રપતિ જો બાઈડેન અને હું ઇઝરાયેલના પોતાના બચાવના અધિકારને સમર્થન આપવા માટે કામ કરી રહ્યા છીએ. અમે ગાઝામાં લોકોને પ્રાપ્ત થતી માનવતાવાદી સહાયની જરૂરિયાતને સમર્થન આપીએ છીએ. અમે માનીએ છીએ કે હમાસ અને પેલેસ્ટાઇન વચ્ચેના તફાવતને સમજવું ખૂબ જ મહત્વપૂર્ણ છે’
ઉપરાષ્ટ્રપતિ કમલા હેરિસે કહ્યું, “અમે અમેરિકન બંધકોને ઘરે લાવીએ અને તે પ્રદેશમાં તણાવ વધતો અટકાવીએ તે અત્યંત મહત્વપૂર્ણ છે. તે ખૂબ જ મહત્વપૂર્ણ છે કે જ્યારે આપણે દિવાળી જેવા તહેવારની ઉજવણી કરીએ છીએ, ત્યારે સત્ય બોલવા પર પ્રકાશ પડવો જરૂરી છે. હું પેલેસ્ટિનિયન લોકો માટે પણ આ કહેવા માંગુ છું, મેં તે ઘણી વખત કહ્યું છે અને હું ફરીથી કહીશ, તેમને અધિકાર છે અને તેઓ આત્મનિર્ણય અને ગૌરવની તકને પાત્ર છે. અમે પણ આને સમર્થન આપતા રહીશું.’
ઉપરાષ્ટ્રપતિએ ચૂંટાયેલા ભારતીય-અમેરિકન સાંસદો રો ખન્ના, શ્રી થાનેદાર, રાજા કૃષ્ણમૂર્તિ અને પ્રમિલા જયપાલ સિવાય આમંત્રિત મહેમાનો સાથે વાતચીત કરી ન હતી. હેરિસ દિવાળીની ઉજવણી કરે તે પહેલાં, ઘણા સંગઠનોએ ઉજવણીનો બહિષ્કાર કરવાની અપીલ કરી હતી.
