ભારતની સૈન્ય શક્તિમાં બમ્પર વધારો: અમેરિકાએ ₹770 કરોડના ‘જેવલિન’ મિસાઇલ અને ‘એક્સકેલિબર’ ડીલને આપી મંજૂરી!
વોશિંગ્ટન: અમેરિકાએ ભારત સાથેના બે મહત્ત્વપૂર્ણ સૈન્ય સોદાઓને મંજૂરી આપી દીધી છે, જેનું કુલ મૂલ્ય આશરે 93 મિલિયન અમેરિકન ડોલર એટલે કે લગભગ રૂ. 770 કરોડ છે. આ સોદાઓ નવી દિલ્હીની ચોકસાઇથી હુમલો કરવાની ક્ષમતા અને આર્મર વિરોધી સંરક્ષણ પ્રણાલીને મજબૂત બનાવશે. આ સોદાઓને યુએસ સ્ટેટ ડિપાર્ટમેન્ટ દ્વારા મંજૂરી આપવામાં આવી છે, જે ભારતની સૈન્ય આધુનિકીકરણની યોજનામાં એક મોટું પગલું છે.
ડિફેન્સ સિક્યોરિટી કોઓપરેશન એજન્સી (DSCA) દ્વારા જાહેર કરાયેલ એક નોટિફિકેશન મુજબ, યુએસ સ્ટેટ ડિપાર્ટમેન્ટે FGM-148 જેવલિન એન્ટિ-ટેન્ક મિસાઇલ સિસ્ટમ્સના સંભવિત $45.7 મિલિયનના વેચાણને મંજૂરી આપી છે. ભારતે આ પેકેજ હેઠળ 100 જેવલિન મિસાઇલો, એક ટેસ્ટ ‘ફ્લાય-ટુ-બાય’ રાઉન્ડ, 25 કમાન્ડ-લૉન્ચ યુનિટ્સ, સાથે તાલીમ સાધનો, સ્પેરપાર્ટ્સ અને વ્યાપક લાઇફસાઇકલ સપોર્ટની વિનંતી કરી હતી.
DSCAએ જણાવ્યું હતું કે આ પ્રસ્તાવિત વેચાણ “પ્રદેશમાં મૂળભૂત સૈન્ય સંતુલનને બદલશે નહીં,” પરંતુ વર્તમાન અને ઉભરતા જોખમો સામે ભારતની ક્ષમતાને ચોક્કસપણે મજબૂત કરશે અને યુએસ-ભારતની વ્યૂહાત્મક ભાગીદારીને વધુ ગાઢ બનાવશે.
એ જ દિવસે બહાર પાડવામાં આવેલી અન્ય એક નોટિફિકેશનમાં ભારતને $47.1 મિલિયનના મૂલ્યના M982A1 એક્સકેલિબર ચોકસાઇ-માર્ગદર્શિત આર્ટિલરી રાઉન્ડ્સ (Excalibur precision-guided artillery rounds)ના વેચાણને મંજૂરી મળી હોવાની પુષ્ટિ કરવામાં આવી છે. આ પેકેજમાં 216 જેટલા એક્સકેલિબર પ્રોજેક્ટાઇલ્સ, તેના સંબંધિત ફાયર-કંટ્રોલ કમ્પોનન્ટ્સ, ટેકનિકલ સહાયતા અને વ્યાપક લોજિસ્ટિકલ સપોર્ટનો સમાવેશ થાય છે.
જેવલિન અને એક્સકેલિબર બંને પ્રણાલીઓ હાલમાં ભારતીય સેનામાં મર્યાદિત સંખ્યામાં સેવારત છે. નવા હસ્તાંતરણનો મુખ્ય હેતુ હાલના સ્ટૉક્સની પૂર્તિ કરવી, ઓપરેશનલ ક્ષમતા વધારવી અને યુએસ-મૂળના પ્લેટફોર્મ્સ સાથે ઇન્ટરઓપરેબિલિટીમાં સુધારો લાવવાનો છે.
DSCAએ જણાવ્યું હતું કે, “આ વેચાણનો ઉદ્દેશ ભારતની પ્રથમ-હુમલાની સચોટતા સુધારવાનો છે અને એ સુનિશ્ચિત કરવાનો છે કે દેશ વર્તમાન અને ભવિષ્યના જોખમોનો સામનો કરવા માટે સારી સ્થિતિમાં છે.” આ બંને સોદા ભારતની સંરક્ષણ ફાયર-પાવર અને ગતિશીલતાના આધુનિકીકરણમાં એક મહત્ત્વપૂર્ણ પગલું છે, જે અવરોધ અને હોમલેન્ડ સંરક્ષણને મજબૂત કરવાના તેના ઉદ્દેશ્ય સાથે સુસંગત છે.
