ગાઝા બાદ હવે સીરિયા ઇઝરાયેલના નિશાન પર: હુમલામાં 13 લોકો માર્યા ગયા
દમાસ્કસ: ગાઝામાં ચાલી રહેલા સંઘર્ષની વચ્ચે હવે ઇઝરાયેલે દક્ષિણ સીરિયાના એક ગામને નિશાન બનાવ્યું હતું. સીરિયાની સમાચાર એજન્સીના જણાવ્યા અનુસાર, ગામમાં રાત્રિના અંધારામાં ચાલેલા એક અભિયાન દરમિયાન થયેલી ગોળીબારમાં ઓછામાં ઓછા 13 લોકોના મોત થયા છે. સીરિયાના વિદેશ મંત્રાલયે ઇઝરાયેલના આ ઓપરેશનની સખત નિંદા કરી છે અને તેને ‘ભયાનક નરસંહાર’ ગણાવ્યો છે.
સીરિયાઈ પ્રશાસને આ હુમલાને યુદ્ધ અપરાધ ગણાવતા કહ્યું છે કે ઇઝરાયેલ ફરી એકવાર સમગ્ર ક્ષેત્રમાં અશાંતિ ફેલાવવા અને હિંસાની આગ ભડકાવવાનો પ્રયાસ કરી રહ્યું છે. જોકે ઇઝરાયેલી સેનાએ દાવો કર્યો છે કે આ અભિયાનમાં ‘જામા ઇસ્લામિયા ગ્રુપ’ના આતંકવાદીઓને પકડવામાં આવ્યા હતા, જે હમાસ અને હુતીઓ સાથે મળીને ઇઝરાયેલ વિરુદ્ધ ષડયંત્ર રચી રહ્યા હતા. એક અહેવાલ અનુસાર તેમના પણ 6 સૈનિકો ઘાયલ થયા છે અને અભિયાન દરમિયાન કેટલાક ઉગ્રવાદીઓ માર્યા ગયા છે.
આ પણ વાંચો: ‘…તો ઇઝરાયેલ ફરી યુદ્ધ શરુ કરી દેશે’ નેતન્યાહૂએ ચીમકી ઉચ્ચારી, યુએસ પણ સાથ આપશે…
હુમલામાં ઘાયલ થયેલા પીડિતોએ સ્થાનિક મીડિયાને જણાવ્યું કે, “અમે રાત્રે સૂતા હતા અને સવારે ભયંકર ગોળીબારના અવાજથી જાગ્યા. બહાર નીકળતા જોયું તો ગામમાં ઇઝરાયેલી સેનાનું અભિયાન ચાલી રહ્યું હતું, ચારેબાજુ સૈનિકો અને ટેન્ક તૈનાત હતા, અને ત્યારબાદ હવાઈ બોમ્બમારો શરૂ થયો.”
ઇઝરાયેલી સેનાએ દાવો કર્યો છે કે તેના સૈનિકોએ ગોળીબારના જવાબમાં કાર્યવાહી કરી હતી અને હવાઈ હુમલાની મદદ લેવામાં આવી હતી. સેનાના કહેવા મુજબ, આ અભિયાન હવે સમાપ્ત થઈ ગયું છે, તમામ શંકાસ્પદોને પકડી લેવાયા છે અને અનેક ઉગ્રવાદીઓ માર્યા ગયા છે. સીરિયાના વિદેશ મંત્રાલયે ઇઝરાયેલની આ કાર્યવાહીને સીરિયાની સાર્વભૌમતાનું ઉલ્લંઘન ગણાવ્યું છે.
