બ્રિટન સરકાર વિરોધ પ્રદર્શનો પર અંકુશ લગાવવા પોલીસને વધુ સત્તા આપશે…

લંડનઃ બ્રિટન સરકાર દેશમાં વારંવાર થતા વિરોધ પ્રદર્શનોને ડામવા માટે પોલીસ દળોને વધુ સત્તા આપવાની યોજના ઘડી રહ્યું છે. આ જાણકારી પ્રતિબંધિત સમૂહ પેલેસ્ટાઇન એક્શનના સમર્થનમાં લંડનમાં આયોજિત એક કૂચમાં લગભગ ૫૦૦ લોકોની ધરપકડ કર્યાના એક દિવસ પછી બહાર આવી છે.

આ નવી સત્તાની વિગતો આગામી અઠવાડિયે આપવામાં આવશે. જે વરિષ્ઠ અધિકારીઓને અગાઉની વિરોધ ગતિવિધિઓની ‘સંચિત અસર’ પર વિચાર કરવાની પરવાનગી આપશે.

બ્રિટનના ગૃહ કાર્યાલયે જણાવ્યું કે જો કોઇ વિરોધ પ્રદર્શન એક જ જગ્યાએ અઠવાડિયા સુધી ચાલુ રહે છે અને વારંવાર અશાંતિનું કારણ બને છે તો પોલીસને આયોજકોને કાર્યક્રમ અન્ય જગ્યાએ આયોજિત કરવાનો નિર્દેશ આપવાનો અધિકાર રહેશે. આવી શરતોનું ઉલ્લંઘન કરવા પર ધરપકડ અને કાર્યવાહી કરવામાં આવશે.

બ્રિટનના ગૃહ સચિવ શબાના મહમૂદે જણાવ્યું કે આપણા દેશમાં વિરોધ પ્રદર્શનનો અધિકાર મૂળભૂત સ્વતંત્રતા છે. જો કે આ સ્વતંત્રતા તેમના પડોશીઓની ભય વિના જીવન જીવવાની સ્વતંત્રતા સાથે સંતુલિત હોવી જોઇએ.

તેમણે કહ્યું કે આ પરિવર્તન વિરોધ પ્રદર્શનના અધિકારનું રક્ષણ સુનિશ્ચિત કરવાની દિશામાં એક મહત્વપૂર્ણ પગલું છે. તેમજ આ દેશમાં દરેક વ્યક્તિ સુરક્ષિત અનુભવે તેની પણ ખાતરી કરે છે.

આ પણ વાંચો…બ્રિટનમાં યહૂદી ધર્મસ્થળની બહાર મોટો હુમલો: પોલીસ ફાયરિંગમાં હુમલાખોર ઠાર