પેસિફિક મહાસાગરના કિનારે UFO દેખાયું: કાર્ગો જહાજના ક્રૂ મેમ્બર્સે કેમેરામાં કર્યું રેકોર્ડ, દુનિયામાં ખળભળાટ!
એલિયન્સ અને તેમની ઉડનતશ્તરી એટલે કે UFO (અનઆઇડેન્ટિફાઇડ ફ્લાઇંગ ઓબ્જેક્ટ) અંગેના દાવાઓ તમે અવારનવાર સાંભળ્યા હશે, પરંતુ કેનેડાના દરિયાકિનારેથી આવેલા એક ચોંકાવનારા અહેવાલે સમગ્ર દુનિયાને હચમચાવી દીધી છે.
પ્રથમ વખત પેસિફિક મહાસાગરના કિનારા નજીક એલિયન્સનું UFO સમુદ્રમાં ઉતરતું જોવા મળ્યું હતું. આ બનાવ એક કાર્ગો જહાજના ક્રૂ મેમ્બર્સ દ્વારા નજરે જોયો અને કેમેરામાં પણ રેકોર્ડ કર્યો હતો, જેના કારણે આ રહસ્યમય ઘટનાએ વિશ્વભરમાં સનસનાટી મચાવી દીધી છે.
આપણ વાચો: જ્યારે ભારતીય વાયુસેનાના બે રાફેલ્સે આકાશમાં દેખાતા UFOનો પીછો કર્યો…
આ સમગ્ર ઘટના 28 નવેમ્બરની રાત્રે લગભગ 11:45 વાગ્યાની છે. જાપાનથી વાનકુવર જઈ રહેલા માલવાહક જહાજ ‘એમએસ પેસિફિક સ્ટાર’ના ઓટોમેટિક સુરક્ષા કેમેરામાં આ આશ્ચર્યજનક દૃશ્ય કેદ થયું. વીડિયોમાં આકાશમાં એક ચળકતી ડિસ્ક-આકારની વિશાળ વસ્તુ જોવા મળી, જે પાણીની સપાટીથી માત્ર 50-60 મીટરની ઊંચાઈ પર અત્યંત તેજ ગતિથી ઉડી રહી હતી.
કેપ્ટન રોબર્ટ મેકન્ઝીએ જણાવ્યું કે અમે પહેલા વિચાર્યું કે તે કોઈ ડ્રોન અથવા સૈન્ય વિમાન હશે, પરંતુ તેની ગતિ અને આકાર જોઈને ક્રૂના બધા સભ્યો ડરી ગયા હતા. વીડિયોમાં આ વસ્તુ પહેલા એક તેજસ્વી પ્રકાશ તરીકે દેખાઈ પછી અચાનક ઝડપથી ઉપર ઉઠી અને માત્ર 4-5 સેકન્ડમાં જ વાદળોમાં ગાયબ થઈ ગઈ.
સૌથી વધુ આશ્ચર્યજનક વાત એ હતી કે આ UFO જેવી દેખાતી વસ્તુમાંથી નીચેની તરફ વાદળી-લીલા રંગના કિરણો નીકળી રહ્યા હતા, જે સમુદ્રની સપાટીને સ્પર્શી રહ્યા હતા. આ અસામાન્ય ઘટના દરમિયાન જહાજની રડાર અને જીપીએસ સિસ્ટમ પણ થોડા સમય માટે બંધ થઈ ગઈ હતી.
આપણ વાચો: મણિપુરના આકાશમાં દેખાયું UFO
કેપ્ટને ખુલાસો કર્યો કે આ UFOની સ્પીડ કોઈ પણ માનવ નિર્મિત વિમાન કરતાં સેંકડો ગણી વધુ ઝડપી હતી. ક્રૂના 18 સભ્યએ આ દ્રશ્ય પોતાની આંખોથી જોયું છે. આ વીડિયો સોશિયલ મીડિયા પર વાયરલ થયા બાદ કેનેડાની રોયલ કેનેડિયન એરફોર્સ અને અમેરિકાની NORAD (નોરાડ) સંસ્થાએ પણ તાત્કાલિક ધોરણે તેની તપાસ શરૂ કરી છે.
વૈજ્ઞાનિકોનું માનવું છે કે કેનેડાના દરિયાઈ કિનારા પર જોવા મળેલી આ વસ્તુની ટેકનિક કોઈ પણ હાલની માનવ નિર્મિત ટેકનોલોજી સાથે મેળ ખાતી નથી. કેટલાક નિષ્ણાતો તેને ‘અજ્ઞાત હવાઈ ઘટના’ (UAP – Unidentified Aerial Phenomenon)ની શ્રેણીમાં મૂકી રહ્યા છે. કેનેડાના સંરક્ષણ મંત્રાલયે આ ઘટનાને “રાષ્ટ્રીય સુરક્ષાની દૃષ્ટિએ ગંભીર” ગણાવીને ટૂંક સમયમાં સંપૂર્ણ રિપોર્ટ જાહેર કરવાની જાહેરાત કરી છે.
બીજી તરફ UFO સંશોધકોનો દાવો છે કે છેલ્લા 6 મહિનામાં બ્રિટિશ કોલંબિયાના દરિયાકિનારે આવી 12થી વધુ ઘટના નોંધાઈ છે. હવે દુનિયાભરના લોકો તે 47 સેકન્ડના વાયરલ વીડિયોને જોઈને એક જ સવાલ પૂછી રહ્યા છે: શું એલિયન્સ ખરેખર ધરતી પર આવી ગયા છે?
