ટ્રમ્પના ભાષણ એડિટ કરવા બદલ BBC વિવાદમાં; ડિરેક્ટર-જનરલ અને ન્યૂઝ હેડે આપ્યા રાજીનામાં
લંડન: યુનાઈટેડ સ્ટેટ્સના રાષ્ટ્રપતિ ડોનાલ્ડ ટ્રમ્પે વર્ષ 2021 માં આપેલા ભાષણોને એડિટ કરી એક ડોક્યુમેન્ટરીમાં ખોટી રીતે દર્શાવવા કારણે બ્રિટિશ પબ્લિક-સર્વિસ બ્રોડકાસ્ટર BBC વિવાદમાં ફસાઈ હતી. એવામાં, BBCના ડિરેક્ટર-જનરલ ટિમ ડેવી (Tim Davie) અને ન્યૂઝ હેડ ડેબોરાહ ટર્નેસ (Deborah Turness)એ રાજીનામા આપ્યા છે.
BBCએ તેની વેબસાઈટ પર એક નિવેદન જાહેર કર્યું છે, જેમાં જણાવવામાં આવ્યું કે તેમના પેનોરમા પ્રોગ્રામ દ્વારા ડોક્યુમેન્ટરી સિરીઝના એક એપિસોડમાં ઉપયોગમાં લેવાયેલા રાષ્ટ્રપતિ ટ્રમ્પના એડિટ કરેલા ભાષણને કારણે દર્શકો ગેરમાર્ગે દોરાયા હતાં.
BBCના નિવેદન મુજબ પાંચ વર્ષની નોકરી દમિયાન ડેવી ઘણાં વિવાદોમાં રહ્યા હતાં અને તેમના પર પક્ષપાતના આરોપોને કારણે દબાણ વધી રહ્યું હતું.
ડેવીએ રાજીનામું આપતા કહ્યું, કે મારા રાજીનામા પાછળ BCCની આસપાસ ચાલી રહેલી ચર્ચા એકમાત્ર કારણ નથી. BBC સારું પ્રદર્શન કરી રહ્યું છે, પરંતુ કેટલીક ભૂલો થઈ છે અને ડિરેક્ટર જનરલ તરીકે મારે અંતિમ જવાબદારી લેવી પડશે.
ટર્નેસે કહ્યું કે પેનોરમા પ્રોગ્રામ સાથે જોડાયેલો વિવાદ એવા સ્તરે પહોંચી ગયો છે, જ્યાં BBCને નુકસાન થઇ શકે છે.
શું છે વિવાદ:
એક બ્રિટીશ અખબારે BBCના લીક થયેલા એક ઇન્ટરનલ મેમો માહિતી જાહેર કરી હતી, ત્યાર બાદ આ વિવાદ શરુ થયો હતો. યુએસ રાષ્ટ્રપતિ ટ્રમ્પના ભાષણના બે ભાગોને એકસાથે એડિટ કરવામાં આવ્યું હતું, જેને જોતા એવું લાગતું હતું કે તેમણે જાન્યુઆરી 2021 ના કેપિટોલ હિલ રમખાણોને પ્રોત્સાહન આપ્યું હતું.
આ અહેવાલ પ્રકાશિત થતા ટ્રમ્પે કહ્યું કે ભ્રષ્ટ પત્રકારો ખુલ્લા પડી ગયા છે, આ ખૂબ જ અપ્રમાણિક લોકો છે તેમણે રાષ્ટ્રપતિની ચૂંટણીને ગેરમાર્ગે દોરવા પ્રયાસ કર્યો હતો.
અહેવાલો અનુસાર, ટિમ ડેવી અને ડેબોરાહ ટર્નેસ આજે જાહેર માફી માંગી શકે છે.
