યુક્રેને રશિયાના 2 એરબેઝ પર મોટો ડ્રોન હુમલો કર્યો, 40 ફાઈટર પ્લેન ધ્વસ્ત
મોસ્કો: રશિયા અને યુક્રેન વચ્ચે હજુ પણ યુદ્ધ ચાલી રહ્યું છે. જેમાં હવે યુક્રેને રશિયાના 2 એરબેઝ પર મોટો ડ્રોન હુમલો કર્યો છે. એક રશિયન અધિકારીએ પણ યુક્રેન દ્વારા કરવામાં આવેલા આ હુમલાની પુષ્ટિ કરી છે.
આ હુમલામા 3 લોકોના મોતની આશંકા છે. આ હુમલાના સ્થળે ભારે ધુમાડો નીકળતો જોવા મળી રહ્યો છે અને લોકોમાં અરાજકતા છે. યુક્રેનિયન મીડિયાનો દાવો છે કે આ સમય દરમિયાન 40 થી વધુ રશિયન વિમાનો નાશ પામ્યા છે.
આપણ વાંચો: રશિયા અને યુક્રેન યુદ્ધ કેદીઓની અદલાબદલી કરી, પ્રિયજનો વચ્ચે પહોંચતા જ આંખો છલકાઈ
ગવર્નરે સાઇબિરીયામાં પ્રથમ ડ્રોન હુમલાની પુષ્ટિ કરી
રશિયાના ઇર્કુત્સ્ક પ્રદેશના ગવર્નરે સાઇબિરીયામાં પ્રથમ ડ્રોન હુમલાની પુષ્ટિ કરી છે. તેમણે કહ્યું કે લશ્કરી એકમને નિશાન બનાવવામાં આવ્યું છે. સેના અને નાગરિક કાર્યવાહી દળો પહેલાથી જ ખતરાનો સામનો કરવા માટે રોકાયેલા છે. ડ્રોન લોન્ચ બેઝને અવરોધિત કરવામાં આવ્યો છે.
40 થી વધુ વિમાનોનો નાશ કરવાનો દાવો
મીડિયા અહેવાલ મુજબ યુક્રેને રશિયાના બે મુખ્ય એરબેઝ પર મોટો ડ્રોન હુમલો કરવાનો દાવો કર્યો છે, જેમાં 40 થી વધુ રશિયન લશ્કરી વિમાનોનો નાશ થયાનો દાવો કરવામાં આવ્યો છે.
આપણ વાંચો: રશિયા અને યુક્રેન વચ્ચે યુદ્ધવિરામ થશે?: ગ્લોબલ મીડિયા હાઉસના દાવાથી ખળભળાટ
યુક્રેનિયન સુરક્ષા સેવા (SBU)ના એક અધિકારીના જણાવ્યા અનુસાર આ હુમલો રશિયાના ઓલેન્યા એરબેઝ અને બેલાયા એરબેઝ પર કરવામાં આવ્યો હતો. જે અનુક્રમે રશિયાના ટુપોલેવ Tu-95 અને Tu-22M3 બોમ્બર્સના બેઝ છે. આ હુમલામાં નાશ પામેલા લડવૈયાઓમાં A-50 AWACS એરક્રાફ્ટનો પણ સમાવેશ થાય છે.
રશિયાના પરમાણુ સબમરીન પોર્ટ પર મોટો હુમલો
આ દરમિયાન માહિતી આવી રહી છે કે યુક્રેને રશિયાના પરમાણુ સબમરીન પોર્ટ પર પણ મોટો હુમલો કર્યો છે. રશિયાના સેવેરોમોર્સ્કમાં વિસ્ફોટ અને ધુમાડાના ગોટા સંભળાયા છે. જે પરમાણુ સશસ્ત્ર સબમરીન માટે સ્ટોરેજ પોર્ટ છે.
જે બેરેન્ટ્સ સમુદ્ર નજીક કોલા ખાડીમાં રશિયન ઉત્તરીય ફ્લીટનો મુખ્ય બેઝ છે. રશિયાની પરમાણુ સંચાલિત સબમરીનનો બે તૃતીયાંશ ભાગ અહીં છે. જેમાં યાસેન, ઓસ્કાર II, સીએરા II અને ખાસ હેતુવાળી સબમરીનનો સમાવેશ થાય છે.
આપણ વાંચો: યુક્રેન-રશિયાનું યુદ્ધ પૂરું કરવાની ચર્ચા ચાલતી હતી અને ટ્રમ્પ અને ઝેલેન્સ્કી પોતે જ બાખડી પડ્યા
રશિયાની સુરક્ષાની આ મોટી ખામી
વિદેશી મીડિયામાં એવો દાવો કરવામાં આવી રહ્યો છે કે યુક્રેને રશિયન બેઝ નજીક એક ટ્રક કન્ટેનરથી આ મોટો ડ્રોન હુમલો કર્યો હતો. આનો એક વીડિયો વિદેશી મીડિયામાં પણ બતાવવામાં આવી રહ્યો છે. જેમાં કન્ટેનરમાંથી ડ્રોન છોડતા જોઈ શકાય છે. રશિયાની સુરક્ષાની આ મોટી ખામી માનવામાં આવે છે.
રશિયાની 50 હજાર સૈનિકો તૈનાત કરીને કિવ પર મોટા હુમલાની યોજના
એક વીડિયો સોશિયલ મીડિયા પર શેર કરવામાં આવ્યો છે. જેમાં એરબેઝ પર પાર્ક કરેલા રશિયન વિમાનોનો નાશ થતો જોવા મળે છે. યુક્રેન દ્વારા રશિયા પર અત્યાર સુધીનો આ સૌથી મોટો અને ઘાતક ડ્રોન હુમલો માનવામાં આવી રહ્યો છે. યુક્રેને આ હુમલો એવા સમયે કર્યો છે જ્યારે એક દિવસ પહેલા જ રશિયાએ સરહદ પાર 50 હજાર સૈનિકો તૈનાત કરીને કિવ પર મોટા હુમલાની યોજના બનાવી હતી.