ઇઝરાયલમાં ભ્રષ્ટાચારના કેસોનો સામનો કરી રહેલા વડાપ્રધાન નેતન્યાહૂએ રાષ્ટ્રપતિ પાસે માફી માંગી
તેલઅવીવ : ઇઝરાયલના ઇતિહાસમાં એક મોટી ઘટના બની છે. જેમાં ભ્રષ્ટાચારના કેસનો સામનો કરી રહેલા ઇઝરાયલના વડાપ્રધાન બેન્જામિન નેતન્યાહૂએ રાષ્ટ્રપતિ આઇઝેક હર્ઝોગ પાસેથી ઔપચારિક રીતે માફી માંગી છે. તેમજ કોઈ વર્તમાન વડાપ્રધાને માફી માંગી હોય તેવી આ પ્રથમ ઘટના છે.
રાષ્ટ્રપતિ કાર્યાલયે તેને ઔપચારિક વિનંતી ગણાવી
આ અંગે ઇઝરાયલના વડાપ્રધાન બેન્જામિન નેતન્યાહૂના કાર્યાલયે નિવેદનમાં જણાવ્યું હતું. જેમાં પીએમ નેતન્યાહૂએ રાષ્ટ્રપતિ કાર્યાલયના કાનૂની વિભાગને માફી અરજી સુપરત કરી છે. રાષ્ટ્રપતિ કાર્યાલયે તેને ઔપચારિક વિનંતી ગણાવી હતી અને કહ્યું હતું કે આ અરજીના ગંભીર અને દુરોગામી પરિણામો હોઈ શકે છે. નેતન્યાહૂ પર ત્રણ અલગ અલગ કેસોમાં છેતરપિંડી, વિશ્વાસઘાત અને લાંચ લેવાનો આરોપ છે. તેમના પર રાજકીય તરફેણના બદલામાં અમીરોને અયોગ્ય લાભ આપવાનો આરોપ છે. તેમને હજુ સુધી કોઈપણ કેસમાં દોષિત ઠેરવવામાં આવ્યા નથી.
રાષ્ટ્રપતિ દ્વારા માફી આપવાથી તેમની ટ્રાયલનો અંત આવશે
ઇઝરાયલના વડાપ્રધાન બેન્જામિન નેતન્યાહૂએ એવા સમયે માફી માંગી છે. જયારે થોડા સમય પૂર્વે અમેરિકા રાષ્ટ્રપતિ ડોનાલ્ડ ટ્રમ્પ દ્વારા જાહેરમાં ઇઝરાયલને નેતન્યાહૂને માફ કરવાની અપીલ કરવામાં આવી હતી. નેતન્યાહૂ વિરુદ્ધ કેસ ઘણા વર્ષોથી ચાલી રહ્યા છે. તેમજ રાષ્ટ્રપતિ દ્વારા માફી આપવાથી તેમની ટ્રાયલનો અંત આવશે અને બધા આરોપો રદ થઈ જશે.
બધાની નજર હવે રાષ્ટ્રપતિ આઇઝેક હર્ઝોગના નિર્ણય પર
નેતન્યાહૂની માફીની અરજી કર્યા બાદ બધાની નજર હવે રાષ્ટ્રપતિ આઇઝેક હર્ઝોગના નિર્ણય પર છે. તેમની પાસે અરજી સ્વીકારવી, નકારવી કે વધુ તપાસ કરવા માટે સમિતિની નિમણૂક કરવી તે નક્કી કરવાનો અધિકાર છે. રાષ્ટ્રપતિ કાર્યાલય દ્વારા હજુ સુધી કોઈ અંતિમ નિર્ણય જાહેર કરવામાં આવ્યો નથી.
આ પણ વાંચો…ઇઝરાયલના પીએમ નેતન્યાહૂએ દિલ્હી વિસ્ફોટ અંગે હિન્દીમાં પોસ્ટ કરીને એકજુથતા પ્રદર્શિત કરી
