દિલીપ કુમાર-રાજ કપૂરના પૈતૃક ઘર બનશે મ્યુઝિયમઃ પાકિસ્તાન સરકારે મંજૂર કર્યા ત્રણ કરોડ!

પેશાવરઃ હિન્દી સિનેમાના બે દિગ્ગજ કલાકારો રાજ કપૂર અને દિલીપ કુમારના પાકિસ્તાનમાં પૂર્વજોના ઘર છે. દિવંગત કલાકારોના આ ઘરોનું સમારકામ અને જાળવણી કરવામાં આવશે. આ માટે બજેટ મંજૂર કરવામાં આવ્યું છે.

સત્તાવાર અહેવાલ અનુસાર પાકિસ્તાનની ખૈબર પખ્તુનખ્વા પ્રાંતીય સરકારે ભારતીય ફિલ્મ જગતના દિગ્ગજ કલાકારો દિલીપ કુમાર અને રાજ કપૂરની ઐતિહાસિક ઇમારતોના સમારકામ અને જાળવણી માટે લગભગ ત્રણ કરોડ રૂપિયા મંજૂર કર્યા છે.

આપણ વાંચો: પેશાવરમાં પણ પાકિસ્તાનીઓએ રાજ કપૂરની ૧૦૦મી જન્મજયંતિ ઉજવી

ખૈબર પખ્તુનખ્વાના મુખ્ય પ્રધાન અલી અમીન ગંડાપુર અને પર્યટન અને પુરાતત્વ સલાહકાર ઝાહિદ ખાન શિનવારીની અધ્યક્ષતામાં મળેલી બેઠકમાં આ બજેટ મંજૂર કરવામાં આવ્યું હતું.

બેઠકમાં વિશ્વ બેન્કના કેઆઇટીઈ કાર્યક્રમ હેઠળ ખૈબર પખ્તુનખ્વા પ્રાંતમાં વારસા સંરક્ષણ અને પર્યટન પ્રમોશન માટે મોટા પ્રોજેક્ટ્સને મંજૂરી આપવામાં આવી હતી. રાજ કપૂર અને દિલીપ કુમારની ઐતિહાસિક ઇમારતો જર્જરિત હાલતમાં છે. પાકિસ્તાન સરકારે તેમને પહેલાથી જ રાષ્ટ્રીય વારસો જાહેર કરી દીધો છે.

ખૈબર પખ્તુનખ્વા પુરાતત્વ વિભાગે બંને સ્વર્ગસ્થ કલાકારોના જીવન અને કારકિર્દીને સમર્પિત બંને માળખાને સંગ્રહાલયોમાં રૂપાંતરિત કરવાની યોજના બનાવી છે. 13 જૂલાઈ, 2014ના રોજ પાકિસ્તાનના તત્કાલિન વડા પ્રધાન નવાઝ શરીફે આ ઘરોને રાષ્ટ્રીય વારસા તરીકે જાહેર કર્યા હતા.

આપણ વાંચો: રાજ કપૂર જે ગુજરાતી કલાકારને પિતાતુલ્ય માનતા એવા દિગ્ગજોના દોસ્ત મેઘાણી

પુરાતત્વ વિભાગના ડિરેક્ટર ડૉ. અબ્દુસ સમદે જણાવ્યું હતું કે સરકાર આ મિલકતને હસ્તગત કરવા અને તેને એક સંગ્રહાલયમાં રૂપાંતરિત કરવા માંગે છે જે દિલીપ કુમાર અને રાજ કપૂરની પેશાવરથી મુંબઈ સુધીની યાત્રાને પ્રદર્શિત કરશે, જેમાં એક સમર્પિત ગેલેરીનો પણ સમાવેશ થાય છે.

દિલીપ કુમાર અને રાજ કપૂરની ઐતિહાસિક ઇમારતને સંરક્ષિત કરવા અને તેને સાંસ્કૃતિકસ્થળ તરીકે સાચવવામાં આવશે. બેઠકમાં મંજૂર કરાયેલા અન્ય વારસા સંરક્ષણ અને પ્રવાસન પ્રમોશન પ્રોજેક્ટ્સમાં પ્રાંતના વિવિધ સંગ્રહાલયો અને પુરાતત્વીય સ્થળોનો વિકાસ કરાશે. ઇમારતોના સંરક્ષણ પ્રોજેક્ટ્સનો ઉદ્દેશ્ય પ્રદેશના ઐતિહાસિક અને સાંસ્કૃતિક વારસાનું રક્ષણ કરતા પ્રવાસનને પ્રોત્સાહન આપવાનો છે.