પાકિસ્તાન બન્યું UNSCનું અસ્થાયી સભ્ય, કાશ્મીરનો મુદ્દો ઉઠાવ્યો
પાકિસ્તાન ફરી એકવાર 182 મતો સાથે સંયુક્ત રાષ્ટ્ર સુરક્ષા પરિષદ (UNSC)નું અસ્થાયી સભ્ય બની ગયું છે. પાકિસ્તાને સભ્ય બનતાની સાથે જ કાશ્મીરનો મુદ્દો ઉઠાવ્યો છે. આ પહેલા પાકિસ્તાન વર્ષ 2012-13, 2003-04, 1993-94, 1983-84, 1976-77, 1968-69 અને 1952-53માં સુરક્ષા પરિષદનું સભ્ય રહ્યું હતું. પાકિસ્તાન એવા સમયે યુએનએસસીમાં સામેલ થઈ રહ્યું છે જ્યારે સમગ્ર વિશ્વમાં અશાંતિ પ્રવર્તી રહી છે.
ગુરુવારે UNSCમાં બે વર્ષની મુદત માટે પાંચ દેશોને પસંદ કરવા માટે મતદાન થયું હતું. 15 સભ્યોની કાઉન્સિલમાં 10 બિન-સ્થાયી બેઠકો પ્રાદેશિક જૂથોને ફાળવવામાં આવે છે જેઓ સામાન્ય રીતે તેમના ઉમેદવારોને પસંદ કરે છે. આ વખતે, પ્રાદેશિક જૂથોએ આફ્રિકન સીટ માટે સોમાલિયા, એશિયા-પેસિફિક સીટ માટે પાકિસ્તાન, લેટિન અમેરિકા અને કેરેબિયન સીટ માટે પનામા અને બે મુખ્યત્વે પશ્ચિમી સીટ માટે ડેનમાર્ક અને ગ્રીસને આગળ રાખ્યા હતા.
પાકિસ્તાનને સુરક્ષા પરિષદના સભ્ય તરીકે ચૂંટતાની સાથે જ પાકિસ્તાને ફરી એકવાર કાશ્મીરનો મુદ્દો ઉઠાવ્યો છે. મુનીર અકરમે સંયુક્ત રાષ્ટ્રમાં તેમની પ્રાથમિકતાઓ વર્ણવી છે, જેમાં પેલેસ્ટાઇન અને કાશ્મીરના લોકો માટે સ્વ-નિર્ણયના સિદ્ધાંતને સમર્થન આપવાનો, દક્ષિણ એશિયામાં શાંતિ અને સુરક્ષાને પ્રોત્સાહન આપવાનો, આફ્રિકામાં સુરક્ષા પડકારોના ન્યાયી ઉકેલોને પ્રોત્સાહન આપવાનો, અફઘાનિસ્તાનમાં સામાન્ય વાતાવરણ બનાવવાને પ્રોત્સાહન આપવાનો અને સંયુક્ત રાષ્ટ્રની શાંતિ રક્ષા કામગીરીને સમર્થન આપવાનો સમાવેશ થાય છે.
UNSCમાં હાલમાં પાંચ કાયમી સભ્ય- યુનાઇટેડ સ્ટેટ્સ, રશિયા, ચીન, યુનાઇટેડ કિંગડમ અને ફ્રાન્સ છે, જેઓ વિટો પાવર ધરાવે છે. આ ઉપરાંત ગયા વર્ષે બિન-કાયમી સભ્યો તરીકે ચૂંટાયેલા પાંચ દેશો – અલ્જેરિયા, ગુયાના, દક્ષિણ કોરિયા, સિએરા લિયોન અને સ્લોવેનિયા છે.
